TUKORON ang laing atraksyon sa Abatan River Community Life Tour nga tawgon og Teatro Abatan, usa ka naglutaw nga pasundayagan sa lumad nga arte ug kulturang Bol-anon.
Ang Teatro Abatan salmotan sa mga talentong pinili ug hinashasan gikan sa mga cultural performance group sa Cortes, Maribojoc, Antequera, Balilihan ug Catigbian, mga lungsod nga apil sa Abatan River Community Life Tour.
Gihisgotan ang Teatro Abatan atol sa tigum sa Abatan River Development Management Council (ARDMC) nga gitambongan mismo ni Gob. Edgar Chatto ug kadagkuan sa konseho kansang chairman mao si Catigbian Mayor Roberto Salinas.
Nitambong sab ang magtiayong Awstralyano nga sila si David ug Fiona Aaron kinsa dinapit sa PROCESS Foundation gikan sa pundasyong Australian Business Volunteers. Isip project consultant, ilang gipresentar ang ilang plano sa kaugmaran sa Abatan River.
Gipasalamatan ni Chatto ang nasud sa Awstralya nga usa sa dakung tigsuporta sa kalambuan sa Bohol.
Nitambong sab sa tigum ang mga lider sa lungsod nga apil sa Abatan tour, hepe sa mga natungdang ahensiya, Emmie Roslinda sa PROCESS Foundation nga maoy projeot management officer sa Abatan river tour, ug ubang stakeholders.
No comments:
Post a Comment