P1.1 milyones nga ayuda sa panginabuhi gitunol ngadto sa people’s organization sa Getafe

GITUNOL kaganiha (Martes sa buntag, Hulyo 27) ang kapin sa uno ponto uno milyones pesos (P1.1M) nga ayuda sa panginabuhi sa people’s organization nga Handalcam Sea Kabayan, Inc. sa Getafe.

Nagpadala og representante si Gob. Edgar Chatto sa turnover sa livelihood assistance gumikan sa tigum sa Regional Peace and Order Council (RPOC) sa Bohol Tropics sa syudad sa Tagbilaran.

Ang ayuda naggikan sa livelihood assistance program sa DSWD nga gitawag og Self-Employment Assistance Kaunlaran (SEA-K) Program sumala ni DSWD Regional Director Evelyn Macapobre.

Sa gihapon gipadangat sa gobernador ang iyang pagdasig sa mga sakop sa maong livelihood organization sa Getafe nga dili usikan ang ayuda nga nadawat para ra sab sa kaugmaran sa ilang panginabuhi ug pagpuyo.

Atol sa pagbukas sa Sandugo Agri-Technology Fair dinhi sa niaging semana, gitunol ni Chatto ang livelihood credit assistance sa 11 ka mga people’s organizations nga nagbasi sa nagkalain-laing lungsod.