707 ka mga tawo gipaak sa iro apan way usa nga namatay

Di momenos sa 707 ka mga tawo ang napaakan sa iro sa Bohol sa unang kwarter lang ning tuiga apan way way gikatahong namatay sa rabies sumala sa Office of the Provincial Veterinarian (OPV).

Hinuon og bisag way kinabuhing nakalas sa maong gidaghanon sa napaakan, buot ni Gob. Edgar Chatto nga hingusgan pa ang kampanya batok sa rabies.

Ang zero rabies case usa nang daan ka dakung kalamposan sa rabies prevention and eradication campaign sa Bohol pinangunahan sa OPV ubos kang provincial veterinarian Dr. Stella Marie Lapiz.

Bisan sa ubang mahinungdanong gimbuhaton, wa pasagdi sa buhatan ni Lapiz ang tahas sa pagpamakuna ug pagkapon sa mga iro, pagdasig sa komunidad tumong sa responsible pet ownership, ug paghipos sa mga latagaw nga iro.

Kini gipaabot nga hingusgan pa uban ang mga rabies prevention and eradication councils sa kalungsoran ug Bantay Rabies sa Barangay.

Gani si Lapiz mao mismoy gitahasan sa pagdumala sa bag-o lang gilusad nga Gov. Edgar M. Chatto Awards alang sa labing maayong anti-rabies council sa kalungsoran ug Bantay Rabies sa Barangay.