GIKAHADLOKANG modoble ang kaso sa dengue ning tuiga nga aduna nay 793 ka mga dengue suspect cases sukad sa Enero hangtud ning buwana kon itandi sa 769 lang sa tibuok tuig 2009.
Walo ang kumpirmadong patay sa dengue sa niaging tuig samtang niabot na og unom ang kinabuhing nausik gikan sa Enero 1 hangtud sa Hulyo 16 lang ning tuiga.
Buot ni Gob. Edgar Chatto sa tigum sa Provincial Management Executive Board kagahapon, Lunes, Hulyo 19, nga hingusgan sa Provincial Health Office ug ubang natungdang ahensiya ang tukmang kampanya batok sa dengue.
Hingusgan ang dengue preventive ug curative programs ug mas ipalapad ang information drive sa responsibilidad sa komunidad ug matag panimalay sa pagsumpo sa makamatayng sakit nga dala sa lamok.
Suod sa dughan ni Gob. Chatto ang kampanya batok sa dengue kay giingong ang labing unang kaso sa pagkamatay gumikan sa dengue sa Bohol kaniadto naglambigit mismo sa iyang manghud nga babaye. Si Chatto hayskul pa niadtong higayona.
No comments:
Post a Comment