Kaseryoso sa mga hepe sa buhatan sa kapitolyo atol sa planning workshop gidayeg sa bag-ong gobernador

NAKADAYEG og daku si Gob. Edgar Chatto sa partisipasyon nga gipakita sa mga hepe sa buhatan sa kapitolyo sa tulo ka adlaw nga strategic planning workshop didto sa Bohol Plaza sa Dauis.

Apan nipahinumdum sab ang gobernador sa gikasabotan nga ipadangat gyud ngadto sa mga kawani sa matag buhatan ang mapuslanong resulta sa workshop.

Nunot niini buot sa hepe ehekutibo sa probinsiya nga makahibawo ug makasabot ang mga departamento ug opisina sa kapitolyo sa gimbuhaton sa usag-usa.

Kini aron ang matag buhatan andam nga makapadangat sa komon nga mensahe sa pangalagad ngadto sa katawhan.

Sa samang paagi ikasangyaw ngadto sa katawhan ang sistema sa panggoberno sa lalawigan kansang mga buhatan takus og maalagaron kay nasayud sa ilang mga katungdanan.