Gipasalig sa pangulo sa mga mayor ang hingpit nga suporta ngadto sa administrasyon sa probinsiya

GIPASALIG sa pangulo sa mga mayor sa Bohol ang hingpit nga suporta ngadto sa administrasyon ni Gob. Edgar Chatto ug Bise Gob. Concepcion Lim.

Ang suporta gipadayag sab ni Kong. Erico Aumentado kinsa nitambong uban kang Imboy ug ubang lider sa Bohol sa tigum Provincial Development Council didto sa Balilihan.

Ang tigum sa PDC gihulagway sa mga nakasaksi nga nagmatuod sa saad sa mga nagkabangi nga mga lider sa panahon sa eleksyon nga maghiusa ug kalimtan ang pulitika para sa kalambuan sa probinsiya.

Mismo si Chatto dili buot nga mohari ang kasilag ug pagdumot kay ang eleksyon lumalabay samtang daghan pa ang angayng buhaton sa pag-alibyo sa kahimtang sa katawhang Bol-anon.

Mainitong giabi-abi ni Chatto ang mga bisitang kaubanang lider sa Bohol kay ang tigum sa PDC naatol sa kapistahan sa Balilihan nga maoy lungsod sa gobernador.