Bise Gob. Conching Lim miawhag sa sektor sa agrikultura sa pagpakabana tumong sa mas responsableng panggoberno

GIAWHAG ni Bise Gob. Concepcion Lim ang sektor sa agrikultura sa dili pagpanuko sa pag-apil-apil tumong sa mas responsable ug mapuslanong panggoberno.

Iyang gidasig ang sektor sa pagsugyot og mga maayong palisiya nga puwedeng maaksyonan sa hunta probinsiyal kansang presiding officer mao mismo ang bise gobernador.

Ang awhag ug pagdasig gipalanog ni Lim sa pagbukas sa Sandugo Livestock Festival kanus-a nagkatapok ang mga local agriculture officers, Barangay Livestock Aides, mga mag-uuma mismo ug uban pa.

Matud sa bise gobernador mao man gani nga usa ka batan-on ang gihimong tsirman karon sa komiteba sa agrikultura sa hunta probinsiyal, si Bokal Abel Damalerio, kay kini abtik nga makaduaw sa kaumahan.

Gidasig sab ni Lim ang sektor sa agrikultura sa pagsumbong kon dunay mga kawani sa Sangguniang Panlalalwigan nga di magtagad sa tuyo o panginahanglan sa maong sektor.