Aksyonan sa gobernador ang lugak nga partisipasyon sa mga LGU batok sa krimen

SIGURADOHON ni Gob. Edgar Chatto ang partisipasyon sa mga lokal nga yunit sa kagamhanan kon LGU batok sa kriminalidad.

Buot sab sa gobernador nga kanunayng aktibo ang peace and order council sa matag LGU pinangunahan sa mga mayor.

Kini gipalanog sa hepe ehekutibo sa probinsiya human namatikdan ni Loay Mayor May Imboy, kinsa mao say presidente sa mga mayor sa Bohol, ang kalugak sa kaubanang mga mayor batok sa kriminalidad.

Nitambong ang pangulo sa League of Municipalities of the Philippines – Bohol Chapter sa tigum sa Provincial Peace and Order Council nga gipangulohan sa gobernador.

Aksyonan ang maong kahingawa ug magpakisusi mismo ang gobernador sa matag lungsod, ilabi na ang mahitungod sa pagtamud sa direktiba tumong sa kalinaw ug kahusay.

Matud sa kapolisan, ang kawat, physical ionjury ug tulis mao karoy nag-una nga mga krimen sa Bohol samtang namatikdan sab ang mga kaso sa pagpatay.