Gibuksan kagahapon ang Sandugo Livestock Festival sa compound sa Provincial Veterinarian’s Office likud sa Provincial Health Office

GIBUKSAN kagahapon, Lunes, Hulyo 26, ang duha ka adlaw nga Sandugo Livestock Festival sa compound sa Office of the Provincial Veterinarian likud sa Provincial Health Office.

Gilusad sa maong okasyon ang Swine Breeder Restocking Program pinangunahan nila ni Bise Gob. Concepcion Lim sa ngalan ni Gob. Edgar Chatto, provincial veterinarian Dr. Stella Marie Lapiz, Bokal Abel Damalerio kinsa chairman sa komiteba sa agrikultura sa hunta probinsiyal ug uban pa.

Ang gobernador didto sa kaulohan kagahapon gumikan sa State of the Nation Address ni Pres. Noynoy Aquino apan iya gyung gipada ngadto sa livestock festival ang bise gobernador.

Nakadugang og alegre sa festival ang karambola sa mga manok igsasabong nga gikampeyonan sa manok sa Barangay Livestock Aide (BALA) sa Maribojoc. Gihimo sab ang dinakpanay sa baktin nga mao mismoy gipremyo sa nakadakop.

Ang livestock festival makahuloganon kay gipasidunggan sab ang mga municipal agriculture officers ug mga BALA nga napili sa niaging eleksyon.

Dugang niini mao ang pag-ila sa dakung kontribusyon sa mga sakop sa BALA nga nitaliwan na. Ang mga livestock aide dakug gikatampo sa pag-ugmad sa industriya sa panghayop sa Bohol sumala ni Dr. Lapiz.

Ang livestock festival giabagan sa PIGROLAC nga nanghatag og mga basahon, gamit sa pagpamuhi og hayop, ug uban pa.