GIPAPANUMPA ni Gob. Edgar Chatto si Catigbian Councilor Ariel Lungay isip bag-ong presidente sa Philippine Councilors’ League sa Bohol atol sa labing unang convocation program sa bag-ong administrasyon sa kapitolyo kagahapon, Lunes.
Kadto mao sab ang labing unang official act ni Chatto sa pagbukas sa labing una niyang semana isip ika-25 nga gobernador sa Bohol.
Isip interim PCL president sa Bohol, si Lungay nahimong awtomatik nga ex-officio member sa hunta probinsiyal hulip kang kanhi PCL-Bohol Pres. Brigido Imboy kinsa napili nga regyular na gyud nga sakop sa Sangguniang Panlalawigan.
Ang pagpapanumpa ni Chatto sa pangulo sa PCL gisaksihan ni Bise Gob. Concepcion Lim ug tanang sakop sa bag-ong hunta probinsiyal.
Kanit niini, ipahigayon karong buntag (Martes) ang inaugural session sa hunta probinsiyal nga pangulohan sa labing unang babayeng bise gobernador nga si Lim ug saksihan mismo sa gobernador ug mga hepe sa departamento sa kapitolyo.
No comments:
Post a Comment