Gob. Chatto giila ug pasidunggan nga bayani sa kabataan ug kabatan-onan

GIILA si Gob. Edgar Chatto nga bayani sa kabataan ug kabatan-onan sa Bohol.

Ang gobernador pasidunggan isip usa sa mga SK Heroes atol sa pagtak-op sa kongreso sa probinsiyal nga pederasyon sa Sangguniang Kabataan sa Bohol Cultural Center karong Sabado.

Giila ang dakung kontribusyon ni Chatto sa di lang sa kaugmaran sa sektor sa kabatan-onan apan sa pagdasig kanila nga magmapuslanon isip masaarong sakop sa komunidad.

Si Chatto nagsugod sa iyang pagpublikong pangalagad isip modelong pangulo sa kanhi Kabataang Barangay (KB) sa Bohol ug batan-ong tingog sa hunta probinsiyal.

Ang mga programa para sa kabatan-onan gihingusgan ni Chatto hangtud sa iyang pagkabise gobernador, kongresista ug karon gobernador.

Pasidunggan ang gobernador isip Sangguniang Kabataan Hero samtang iyang gidasunan ang gikinahanglang positibong reporma ug transpormasyon sa SK sa nasud.

Mahigalaong klima sa patigayon ug episyenteng sistema sa paglisensiya gikinahanglan sa pag-uswag matud sa gobernador

MAHINUNGDANON sa kauswagan sa Bohol ang mahigalaon nga klima sa patigayon ug episyente nga sistema sa pagproseso sa mga lisensiya sumala ni Gob. Edgar Chatto.

Ang pamahayag labing tukma sa pagpahigayon sa business processing ug licensing system orientation workshop sa mga mayor, tsirman sa komiteba sa ways and means sa mga sanggunian, mamahandi, licensing officers ug DILG officers sa kalungsoran.

Ang workshop gipasiugdahan sa Department of Interior and Local Government ug Department of Trade and Industry (DTI) hangtud kagahapon (Miyerkoles).

Matud sa gobernador mas mosalig ang pribadong sektor kon matinud-anon ang kagamhanan ug sayon ang pagproseso sa mga aplikasyon og lisensiya sa patigayon.

Kini nalambigit sab sa diwa sa public-private partnership nga gipakadak-an karon sa nasudnong kagamhanan sumala sa ni Chatto.

Wa masayop ang Bohol sa pagdasig sa organic farming kay kini suportado sa administrasyong Aquino

WA masayop ang pagdasig sa organic farming sa Bohol ubos kang Gob. Edgar Chatto kay ang programa suportado sa administrasyong Aquino.

Nibutyag si Kalihim sa Agrikultura Proceso Alcala nga gigahin na ang inisyal nga P900 milyones sa pagpatuman sa mga inisyatiba sa nagkalain-laing dapit sa nasud nunot sa Organic Agriculture Act o Akta Republika 10068.

Ang organic farming gihatagan og gibug-aton sa nagpadayong Christmas Bazaar sa kapitolyo diin gibaligya ang mga pagkaon ug ubang produkto sa uma nga gikan sa mga tanum nga gigamitan og natural nga abono.

Gilaumang maugmad og samot ang organikong panguma sa Bohol kay gibutyag sab ni Alcala ang pagkakumpleto na sa implementing rules and regulations sa Organic Agriculture Law.

Si Chatto mao mismoy senior deputy chairman sa komiteba sa agrikultura sa Kongreso atol sa pagpasar sa maong balaod nga giduso sa kalihim karon sa agrikultura sa kongresista pa usab siya.

Bol-anong marinero gibuhi-an human sa pito ka buwan nga pag-hostage sa mga armadong piratang Somali

GIBUHI-AN ang Bol-anong marinero human sa pito ka buwan nga pag-hostage kaniya og laing 18 ka mga Pilipino ug 5 ka mga Koreanong tripulante sa mga armadong piratang Somali.

Nahibalik ang marinerong taga-Maribojoc nga gikalipay pag-ayo sa iyang pamilya kay ang iyang kagawasan natunong sab sa kapistahan sa maong lungsod.

Ang ulitawo ug 30 anyos pa nga seaman nihangyo nga di lang sa magpahingan samtang gikaatubang siya mismo ni Gob. Edgar Chatto didto sa balay sa gobernador kagahapon sa buntag.

Nagpakitabang sa OFW Affairs Desk sa kapitolyo niadtong Hulyo ang kabanay sa marinerong Bol-anon samtang aduna say negosasyon nga gihimo ang kompanya sa cargo ship alang sa ilang kagawasan.

Gi-hostage ang mga marinero samtang naglawig ang ilang crude oil tanker sa Indian Ocean niadtong Abril ug gidala ngadto sa lawod sa Somalia diin sila tablag gipriso sa sud sa barko kapin sa tunga sa tuig.

Gibuhi-an sila niadto pa lang Nobiyembre 5 human sa negosasyon nga naglambigit og nuebe milyones dolyares ($9 million).

4 ka mga institusyong pinansiyal mipasalig og P200 bilyones pagsugod sa PPP projects nga naglakip sa new Bohol airport

UPAT ka mga pinansiyal nga institusyon sa kagamhanan ang nipasalig og kinatibuk-ang P200 bilyones pagsugod sa gitawag og Public-Private Partnership (PPP) projects nga naglakip sa new P7.543 bilyones nga new Bohol airport.

Wa pay labot niini ang puhonan sa mga inbestor gikan sa nagkalain-laing nasud sa kalibutan nga nasibot sa inisyatibang PPP sa pagpatuman sa mga dagkung inprastruktura sa administrasyong Aquino.

Ang pasalig o commitment gipadayag sa Development Bank of the Philippines, Social Security System, Land Bank of the Philippines ug Government Service Insurance System.

Kon kahinumduman usa ang tugpahanan sa Panglao nga gitawag karon og new Bohol airport sa mga dagkung proyekto nga gipresentear atol sa PPP Conference sa Marriot Hotel sa kaulohan nga gitambongan mismo ni Pres. Aquino, Gob. Chatto ug 500 ka mga higanteng inbestor sa kalibutan.

Suportado sab sa nahisgotang mga institusyong pinansiyal ang Philippine Infrastructure Development Fund (PIDF) nga mopapaspas sa kaugmaran sa mga inprastruktura sa nasud.

Gawas sa iyang pakigpulong, aduna say open forum si Budget Sec. Butch Abad kinsa mahidangat sa Bohol karong buntag

GAWAS sa iyang pakigpulong, adunay open forum si Budget Sec. Florencio “Butch” Abad uban ang Philippine League of Local Budget Officers (PHILLBO) sa Kabisay-an nga magtagbo sa Bohol Tropics ning adlawa.

Ang kalihim sugaton sa tugpahanan ning syudad karong buntag nila ni Gob. Edgar Chatto, Budget Dir. Carmela Fernan sa Rehiyon 7, Dir. Alfonso Bedonia sa Rehiyon 6 ug opisyales sa PHILLBO kansang Visayas area head ug Bohol president mao si Dauis budget officer Samuel Penales.

Sila molahus sa Bohol Tropics diin mamulong ang kalihim sa Department of Budget and Management ug ang gobernador sa Bohol sa di pa ang open forum.

Hayan adunay press conference uban sa kalihim ug gobernador human sa open forum.

Si Abad gikatakdang mamulong sab sa tigum sa League of Cities of the Philippines sa Peacock Garden sa Baclayon karong palis.

Nasud sa Australia nasibot sa kadasig sa probinsiya sa Bohol kalabot sa PRMF

NASIBOT pag-ayo ang Australian Agency for International Development (AusAID) sa gipakitang kadasig sa probinsiya sa Bohol sa programang Philippines Provincial Roads Management Facility (PRMF).

Buot ni Gob. Edgar Chatto nga makumpleto sa probinsiya ang mga criteria sa PRMF aron mahimuslan ang tanang suporta niini sa mga nag-unang proyekto sa Bohol sama sa kadalanan.

Si Chatto usa sa mga gobernador nga giimbitar aron mosalmot sa Workshop for Governors kalabot sa PRMF sa syudad sa Pasay karong Biyernes.

Ang gobernador gikatakda sab nga makigtagbo sa kadagkuan sa AusAID, Department of Interior and Local Government (DILG) ug ubang piniling gobernador didto sa kaulohan.

Nasudnong konperensiya sa mga hepe sa edukasyong elementarya ipahigayon sa Bohol sugod karong gabii

BUKSAN ang ika-54 nga konperensiya sa mga hepe sa edukasyong pang-elementarya sa tibuok nasud sa Bohol Plaza Resort sa Dauis karong gabii.

Kini tambongan sab sa ilang mga luyo-luyong hepe ug kadagkuan sa Bureau of Elementary Education.

Gipaabot nga ipaambit ni Gob. Edgar Chatto ngadto kanila ang agresibong programa sa pagpatuman sa Bohol sa gitawag og Dynamic Learning Program sa sunod tuig.

Pinasidunggang dinapit si Chatto sa maong nasudnong konperensiya nga napanglantawang moila sa mga kusog ug kahuyang sa sistema sa edukasyong elementarya sa nasud.

Ang National Conference of Chiefs and Assistant Chiefs of Elementary Education usa sab ka laing pagmatuod sa padayon nga pag-ugmad sa turismo sa Bohol isip sentro sa mga konbensyon.

Midangat na dinhi kagahapon ang haya sa Bol-anong OFW nga namatay sa India

Nahidangat dinhi kagahapon ang patayng lawas sa Bol-anong OFW nga si Esmeraldo Patac kinsa namatay sa India.

Dali nga gikalupad nganhi sa Bohol ang haya sa marinerong taga Balilihan gumikan sab sa tabang sa kagamhanang probinsiyal pinaagi sa OFW Affairs Desk.

Ang seaman gikatahong kalit nga giatake sa kasingkasing nga maoy hinungdan sa iyang kamatayon samtang didto sa India ang ilang bapor.

Nakig-alayon ang kapitolyo sa banay sa way swerteng OFW alang sa unsa mang benepisyo ngadto sa iyang pamilya nunot sa gilatid sa balaod.

Korte nga modagan subling mibisita sa Bohol

GILUSAD sa Bohol kaganihang buntag ang mas agresibong programa sa Justice on Wheels (JOW) pinangunahan nila ni Deputy Supreme Court Administrator Nimfa Cuesta-Vilches, Gob. Edgar Chatto ug mga huwes.

Daghang kaso ang dunggon sa sud mismo sa JOW bus nga motuyok sa Bohol ug mobisita sa nagkalain-laing korte sa kalungsoran sa usa ka semana.

Ang JOW usa ka trak nga gituyo sa kagamhanan sa paghimong usa ka korte agig abag sa pagpapaspas sa pagdungog sa mga kaso nga nagtumpi na sa daghang sala.

Gihangop ni Chatto ang subling pagbisita dinhi sa Justice on Wheels kay ang pagtunhay sa balaod gikinahanglan tumong sa malinawon, hapsay ug makiangayon nga sosyedad.

Ang subling paglusad sa Justice on Wheels sa Bohol gisuportahan sa World Bank nga girepresentahan ni Henry Grageda atol sa seremonya sa Hall of Justice sa new capitol site ning syudad.

Mugna-on ni Gob. Chatto ang Bayanihan Coordinating Center sa probinsiya

MUGNA-ON ni Gob. Edgar Chatto ang Bayanihan Coordinating Center nga magsilbeng kutay sa kapitolyo ngadto sa pribadong sektor sa pagpatuman sa mga proyekto.

Pinaagi niini ang kagamhanang probinsiyal ug pribadong sektor magkatampohay og ideya ug kakugi para sa mga mahinungdanong serbisyo ug programa.

Nadasig si Chatto sa pagtukod og Bayanihan Coordinating Center human ilusad sa probinsiya ug Armadong Kusog sa Nasud niadtong Sabado ang Bayanihan sa Barangay Project aron tukoron ang bag-ong eskwelahan sa Matin-ao, Carmen.

Gilusad sab ni Chatto uban nila Brig. Gen. Alan Luga, Brig. Gen. Alejandro Estomo, Maj. Gen. Carlos Holganza ug ubang kadagdakuan sa AFP-National Development Support Command ang Long-Term Partnership on Education Program.

Ang paglusad sa Bayanihan sa Barangay Project sa AFP-NADESCOM nga gitambongan sab sa kadagkuan sa DepEd ug lungsod sa Carmen giingong labing una sa probinsiya ug tibuok nasud.

Butch Abad mobisita sa Bohol sa labing unang higayon isip gamhanan nga kalihim sa budget and management

GIKATAKDANG mobisita si Budget Sec. Butch Abad sa Bohol ugma. Kini maoy labing unang opisyal niya nga biyahe dinhi sukad nga gitudlo ni Pres. Aquino.

Ang labing taas nga opisyal sa Department of Budget and Management (DBM) mamulong sa legislative forum nga tambongan sa mga sakop sa konseho sa kalungsoran.

Si Abad abi-abihon ni Gob. Edgar Chatto sa maong kalihukan sa Bohol Tropics nga tambongan sab sa mga mayor, bise mayor, SB secretary ug budget officer sa kalungsoran.

Matud ni Chatto mahinungdanon ang forum sa mga sakop sa sanggunian kalabot sa paggahin sa mga pondo kay panahon karon sa pagpinalisa sa mga LGU budget alang sa sunod tuig.

Nasudnong tigum sa Bohol ning adlawa motutok sa kaugmaon sa industriya sa balanghoy o kamoteng kahoy sa nasud

TUTOKAN sa usa ka nasudnong tigum sa Bohol karong adlawa ang direksyon sa industriya sa cassava kon kamoteng kahoy o balanghoy sa nasud.

Kini maatol sa National Cassava Stakeholders Consultative Meeting nga buksan sa Bohol Tropics karong buntag. Kini ipahigayon nunot sab sa National Agri-Corn Program sa Departamento sa Agrikultura.

Mamulong si Gob. Edgar Chatto sa kalihukan kay daghan sab ang mga Bol-anon nga nagsalig sa industriya sa kamoteng kahoy o balanghaoy isip sektor sa agrikultura sa lalawigan.

Laing kalihukan sa panguma ang gikatakdang tambongan sa gobernador ugma ug kini kalabot sa industriya sa utanon sa La Suerte, Pilar.

Kanunayng gidasig ni Chatto ang katawhan sa pagtanum og mga utanon pinaagi sa backyard gardening o bisan sa mga kaang nunot sa adbokasiya nga Bahay Kubo Faith.
Ang FAITH nagkahulogan og Food Always In The Home.

Laing mobile service itanyag sa kapitolyo uban ang PRC, NSO ug LTFRB sa ICM Activity karong Disyembre 3

LAING mobile services ang ipadangat sa probinsiya uban ang Professional Regulatory Commission (PRC), National Statistics Office (NSO) ug Land Transportation Franchising and Regulatory Board (LTFRB).

Kini himoon sa maong mga nasudnong ahensiya uban ang kagamhanang probinsiyal sa ICM Activity Center sa Disyembre 3 sumala sa Bohol Employment and Placement Office (BEPO).

Nagkalain-laing serbisyo ang itanyag sa PRC, NSO ug LTFRB sa maong mobile service event nga nasubay sa krusada sa probinsiya sa paghatud sa goberno ngadto sa katawhan.

Aron hapsay ang pag-atiman sa mga kliyente, kadtong adunay tuyo sa PRC gitambagan sa pagkuha daan og priority numbers pinaagi sa pag-adto sa BEPO sa kapitolyo o pagkontak sa mga telepono 501-9847 ug 411-3544.

Kapitolyo ug kasundalohan mag-groundbreaking karong hapon alang sa bag-ong eskwelahan sa bukirang barangay sa Carmen

HIMOON sa kapitolyo ug kasundalohan karong hapon ang groundbreaking ug paglagda sa kasabotan sa pagtukod og bag-ong eskwelahan sa bukirang barangay sa Matin-ao sa Carmen.

Ang kaluhang seremonya pangunahan nila ni Gob. Edgar Chatto, Brig. Gen. Allan Luga ug Maj. Gen. Carlos Holganza uban nila ni Mayor Conchita Delos Reyes ug Bise Mayor Pedro Budiongan, Jr.

Tabangan sa pagtukod sa kagamhanang probinsiyal ug Armadong Kusog sa Pilipinas ang pagtukod sa bag-ong school building inabagan sab sa Philippine Charity Sweepstakes Office.

Mahinungdanon ang maong pasilidad sa elementarya nga magamit di lang sa taga Matin-ao apan sa kabataan sab sa silingang bukiran ug hilit nga dapit.

Gawas nga panaksan sa pagkaon sa rehiyon, ang agrikultura sa Bohol paningkamotan sab nga di moliki sa kausaban sa klima

DILI pa igo nga ang Bohol maoy puno nga panaksan sa pagkaon sa Central Visayas. Angay sang paningkamotan nga ang maong panaksan dili moligti sa di na masabot nga kausaban sa klima.

Kini usa ka hinungdan nganong importante ang Location-Specific Technology Development (LSTD) o pag-ugmad sa teknolohiya sa agrikultura sa dapit diin kini labing tukma sumala ni Gob. Edgar Chatto.

Ang LSTD usa ka banner food production program sa Bohol nunot sa proyektong Bohol Rice UP (Upat Pataas).

Nasubay niini ang pagpahigayon og Farmer’s Field Day ug Forum sa LSTD demonstration site sa Mahangin, Candijay kagahapon (Martes) matud ni PhilRice - Negros Branch manager Engr. Leo Javier ngadto sa gobernador sa Bohol.

Susamang kalihukan ang di pa sab dugay nga gihimo sa ubang dapit sa Bohol agig paglig-on sa katali-an sa PhilRice, Departamento sa Agrikultura, kagamhanan sa Bohol, mga LGU ug sektor sa mag-uuma.

OFW Desk ni Gob. Chatto kabahin na sa pamilya sa mga Bol-anong OFW sa tibuok kalibutan

Kabahin na sa pamilya sa mga Bola-nong OFW sa nagkalain-laing nasud sa kalibutan ang OFW Desk sa kapitolyo nga gitukod ni Gob. Edgar Chatto sukad sa bise gobernador ug kongresista pa siya.

Gani ang OFW Desk o OFW Affairs Unit nga gidumala ni kanhi university professor Reine Real sa sud sa Bohol Employment and Placement Office (BEPO) mao nay gidangpan sa mga OFW sa ilang pagpakisusi sa presyo sa mga medisina dinhi.

Pinaagi sa e-mail ni Engr. Elias Bonite sa Saudi, nagpakitabang ang Boholano Overseas Workers and Community Credit Cooperative (BOWACC) sa OFW Desk sa kapitolyo sa pag-canvass sa presyo ug mga kompanya sa medisina ingon man mga botika dinhi.

Kini magamit sa kooperatiba sa mga migranteng mamumuo para sa kaayohan sa ilang mga pamilya dinhi bisan og atua sila sa mga langyawng nasud.

Buot ni Chatto nga ipatunhay ang kalambigitan sa kagamhanan ngadto sa mga OFW ug ilang mga banay kay ang kapitolyo sa Bohol para sa tanang Bol-anon sa bisan diing dapit sa kalibutan.

Bohol usa sa mga napiling probinsiya para sa HealthPRO sa USAID

NAPILI ang Bohol nga usa sa mga prayoridad nga probinsiya para sa Health Promotion and Communication Program (HealthPRO) sa United States Agency for International Development (USAID).

Ang HealthPRO usa ka tigpatuman sa programa sa USAID sa pag-abag sa mga LGU sa pag-ugmad, pagpalapad ug paglig-on sa kalidad ug kamalungtaron sa promosyon sa kahimsog ug panglawas.

Nunot niini ipahigayon sa HealthPRO ang oryentasyon tali sa mga health officers sa probinsiya ug kalungsoran, kadagkuan sa barangay health workers, social welfare ug health education and promotion officers sa probinsiya, ug uban pa sa Nobiyembre 24-26.

Usa sa mga estratehiya sa HealthPRO ang determinadong lihuk sa mga indibidwal ug impluwensiyadong hugpong sa pagsuporta sa mga mahinungdanong programa sa kagamhanan tumong sa kahimsog ug kaayohan sa katawhan.

Gipasabot ni Chatto ang nanumpa nga opsiyales sa barangay ug SK nga ang ilang obligasyon wa ngadto kaniya apan sa nagpili kanila

GIPASABOT ni Gob. Edgar Chatto ang bag-ong napiling opisyales sa kabaranggayan ug SK nga ang ilang katungdanan wa ngadto sa gobernador sa Bohol o kang bisan kinsa nga nagpapanumpa kanila.

Ang ilang obligasyon anaa sa katawhan nga nagtoong aduna silay katakus inig sugod nilag asumir sa katungdanan karong Disyembre sumala sa gobernador.

Kini kanunayng gisilsil kanila ni Chatto samtang dugang nga mga induction sa barangay ug SK ang gihimo sa gobernador sama didto sa Cortes, Pilar, Duero ug Baclayon.

Ang gobernaod pinasidunggan sab nga bisita sa pagsaul;og kagahapon sa ika-414 nga sumad sa Baclayon diin nahimutang ang labing daan nga simbahang bato sa nasud.

Si Chatto gipili nga mao say mopapanumpa sa mga opisyal sa barangay ug SK sa Guindulman karong hapon (Huwebes) ug Sierra-Bullones ugma.

Nakumpleto na ang Abatan Watershed Characterization Project

Nakumpleto na ang Abatan Watershed Characterization, usa ka mahinungdanong proyekto sa kagamhanan ug NGO nga PROCESS tumong sa malungtarung kalambuan.

Gipresentar sukad kagahapon ug karon (Miyerkoles) ang resulta sa pagtuon ngadto sa mga nag-unang stakeholders aron mugnaon ang komprehensibong plano sa pagdumala sa watershed.

Kini gihimo pinaagi sa Abatan Watershed Integrated Management Planning Workshop sa JJ’s Jeafood Village diin namulong mismo Gob. Edgar Chatto.

Ang Abatan Watershed Characterization Project naayudahan og pondo sa DENR sa panahon nga kongresista pa si Chatto sumala ni PROCESS Exec. Dir. Emi Roslinda.

Ang pinal nga pagtuki sa resulta sa pagtuon gisalmotan sab sa mga sinaligan sa kapitolyo gikan sa komiteba sa environment sa hunta probinsiyal, Provincial Planning and Development Office ug Bohol Environment Management Office.

Nagbayloay og mga maayong ideya sa repormang agraryo ang mga probinsiya sa Bohol ug Cotabato

NAGBAYLO-AY og mga maayong ideya ang Provincial Agrarian Reform Coordinating Committees (PARCCOM) sa Bohol ug Cotabato.

Nibisita mismo sa Bohol ang mga sakop sa PARCCOM sa maong probinsiya sa Mindanao aron makat-onan ang mga mapuslanong pamaagi sa mga programa sa repormang agraryo dinhi.

Kon kahinumduman gilusad didto sa Balilihan di pa dugay nila ni Gob. Edgar Chatto ug kadagkuan sa DAR ang labing unang Agrarian Reform Community Cluster sa Tunga-tungang Kabisay-an.

Gihulagway nga mapuslanon ang pagbisita sa Cotabato PARCCOM dinhi, ilabi na ang panagtagbo uban sa mga sakop sa PARCCOM sa Bohol ubos kang Virgilio Zabala.

Nahinangop ang gobernador sa lakbay-aral sa Cotabato PARCCOM dinhi kay 14 sa mga sakop niini ang adunay dugong Bol-anon.

Gibuksan ug nagpadayon karon ang “X’mas Bazaar” sa kapitolyo

GIBUKSAN kagahapon ug magpadayon hangtud sa Disyembre 20 ang Christmas Bazaar sa atubangan sa kapitolyo.

Giladlad ang mga parol nga ginama sa mga priso sa Bohol District Jail, kanhi BDRC, ug mga buwak, utanon, ubang tanom ug pagkaon gikan sa mga abot sa uma nga wa gamiti og kemikal.

Nagplano si Gob. Edgar Chato nga aduna gyuy permanenteng showcase center sa mga produktong lumad nga modasig sa talento, kakugi ug panginabuhi sa mga Bol-anon.

Gidasig sa buhatan sa agrikultura sa probinsiya ug Bohol District Jail ang publiko sa pagbisita sa Capitol Christmas Bazaar.

Gawas sa mga parol, aduna say matahum nga mga dibuho ang mga priso samtang ang mga pagkaon ginama sa mga sakop sa Bohol-MADe, hugpong sa mga gagmayng tigproseso og pagkaong gikan sa mga abot sa uma nga gigamitan og organic fertilizer. (Leah/EDCom)

Gisaway apan gipasaylo sa gobernador ang pipila nga nagsigeg guba sa turismo sa Bohol

GISAWAY apan sa gihapon gipasaylo ni Gob. Edgar Chatto ang mga nagsabwag og sayop nga mga inpormasyon pagguba sa turismo sa Bohol.

Ang mga tigpamaba sa lonlon mga intriga ug pagdaut sa turismo posibleng di tigbasa o wa gyuy kasayuran sa kaugmaran sa industriya sumala sa gobernador atol sa pagbukas sa Capitol Christmas Bazaar kagahapon (Lunes).

Hinuon gipasaylo sila sa gobernador kay matud ni Chatto hayan wa sila nasayud sa ilang gibuhat.

Sumala sa talaan sa Departamento sa Turismo, ang Bohol nagpabilin nga dinugok nga destinasyon sa Pilipinas ug ang probinsiya kusganon pa gyung gi-endorso ni Tourism Sec. Alberto Lim sa 2010 World Expo sa Shanghai, Tsina.

Bag-ong opisyales sa kabaranggayan ug SK sa Albur manumpa karong hapon

MANUMPA ang bag-ong napili nga opisyales sa kabaranggayan ug Sangguniang Kabataan (SK) sa Alburquerque sa simbahan ni Sta. Monica karong hapon (Martes).

Si Gob. Edgar Chatto maoy gipili nga panumpaan sa mga kapitan ug konsehal sa kabaranggayan samtang ang SK adto manumpa kang Mayor Efren Tungolh.

Gipaabot nga subling ipabati sa gobernador ang iyang pahalipay ngadto kanila uban ang hagit sa dili pagpakyas sa katawhan nga nagpili kanila.

Buot ni Chatto nga pamatud-an sa mga lider sa barangay ug SK ang ilang katakus ug kamatinud-anon kay andam ang probinsiya sa pagsuporta sa mga maayo nilang programa.

Food supply summit himoon sa Land Bank ug ahensiya sa agrikultura uban sa gobernador sugod ning adlawa

IPALANOG ni Gob. Edgar Chatto ang dugang agrikultura atol sa Food Supply Chain Summit nga pasiugdahan sa Land Bank of the Philippines ug Departamento sa Agrikultura sa Bohol Tropics sugod ning adlawa (Martes, Nov. 16).

Ang summit magdasun sa promosyon sa sigurong pagkaon pinaagi sa taas nga produksyon ug pag-usbaw sa abot sa gagmayng mag-uuma ug mananagat sumala ni Land Bank Bohol Lending Center Chief Cecilio Clarete.

Buot sa Land Bank ug DA nga madungog sa summit ang gobernador mismo bisan og kumbinsido ang pinansiyal nga institusyon ug ahensiya sa agrikultura sa gihingusgang paningkamot sa administrasyong Chatto.

Lakip sa hisgotan sa summit ang mga panginahanglan nga sayon ug dali nga iprodukto ug ang potensyal nga merkado sa maong mga panginahanglan.

Kini salmotan sa mga major market players, service providers, support agencies ug lead implementing units.

Ang Food Supply Chain Summit laing pagmatuod sa mahinungdanong public-private partnership alang sa maugmarung agrikultura ug panginabuhi sumala ni Gob. Chatto.

Dili buot ang gobernador nga bawi-on sa nasudnong kagamhanan ang nagahin nang mga pondo sa agrikulltura sa Bohol

DILI buot si Gob. Edgar Chatto nga bawi-on sa nasudnong kagamhanan ang nagahin na nga pondo sa pag-ugmad sa agrikultura sa Bohol sama sa P188 milyones nga para sa irigasyon.

Ang irigasyon usa ka importanteng pasilidad sa panguma ug pormal na nga gihangyo ang administrasyong Aquino pinaagi kang kalihim Alcala sa Agrikultura nga ihinayon ang proyekto.

Matud ni Chatto pormal na niyang gipahibawo ang kalihim sa iyang baruganan ug sa kaubanang lider sa Bohol, lakip na gani ang mga opisyal sa kabaranggayan nga nisuporta niini pinaagi sa resolusyon.

Nibutyag ang gobernador nga nagpadayon sab siya sa paglihuk aron ikapatuman ang daghan pang proyekto nga iya nang napapondohan ning tuiga isip kanhi kongresista.

Hinuon nakasabot si Chatto sa inanay lang nga pagpaglusot sa mga nasudnong pondo sa mga proyekto kay kini paagi sa kagamhanang nasyonbal paglikay nga di kaayo masinati ang deficit.

Gipalanog ni Gob. Chatto ang kalig-on sa iyang prinsipyo sa mga kausaban nga gikinahanglan ug angayng buhaton

GIPALANOG ni Gob. Edgar Chatto ang kalig-on sa baruganan sa iyang administrasyon mahitungod sa mga kausaban nga gikinahanglan ug angayng buhaton.

Kini agig pagtin-aw sa adjustment nga gipatuman sa buhatan ni Provincial Engr. Rosalinda Yu.

Hinuon giklaro sab sa gobernador ang iyang palisiya nga kinahanglang adunay konsultasyon ug pagsinabtanay sa bisan unsa nga departamento sa kapitolyo.

Dili buot ang gobernador nga ang unsa man nga structural adjustment o reorganization sa usa ka departamento makaapekto sa maayo ug episyenteng serbisyo.

Ang improvement o kaugmaran sa departamento ug serbisyo niini maoy labing unang konsiderasyon sa kausaban sumala ni Chatto.

Niklaro sab ang gobernador nga ang status quo o kasamtangang kahimtang o sitwasyon di maoy tukmang tubag kon ugaling gikinahanglan gyud ang positibong kausaban.

Probinsiya may mahinungdanong programa paggiya sa mga gagmayng patigayon ug panginabuhi ngadto sa sayon nga pahuwam

USA sa mga mahinungdanong programa sa probinsiya ang pagsuporta sa mga institusyon ug kalihukan nga mohatag og kasayon sa katawhan ngadto sa mga pahuwam.

Gipangusgan ang sistema sa micro-credit aron ang gagmayng patigayon ug panginabuhi sama sa panagat ug paninda og isda adunay access to credit o pahuwam nga gaan ra sa pagbayad sumala ni Gob. Edgar Chatto.

Matud sa gobernador ang sistema sa 5/6 nga patanto nagmatuod lang sa kakuwang sa mga gagmayng nanginabuhi og access ngadto sa dili bug-at nga pahuwam.

Ang bug-at nga interes sa 5/6 gitumbok atol sa programang Kita ug Ang Gobernador kagahapon (Biyernes, Nov. 12) nga usa sa nakaingon sa mahal nga presyo sa mga isda.

Kini apil sa gitun-an karon sa kagamhanan, sektor sa pangisda, sektor sa mga konsumidor ug uban pa alang sa kaayohan sa kinatibuk-ang katawhang Bol-anon.

Mag-opisina si Gob. Chatto sa iyang sub-office sa Talibon kaduha sa usa ka buwan

KADUHA mag-opisina sa usa ka buwan si Gob. Edgar Chatto sa iyang Governor’s Sub-Office sa Talibon alang sa kasayon sa mga Bol-anon sa amihanang bahin sa lalawigan.

Aduna kiniy mga staff ug linya sa telepono nga direktang makakontak sa kapitolyo dinhi sa syudad sa Tagbilaran mao nga modangat gyud ngadto sa gobernador ang nagkalain-laing isyo ug kahingawa sa katawhan.

Kini pamaagi aron maserbisyohan ang mga konstituwente nga layo na sa kapitolyo sa Tagbilaran bisag di kaadto ang gobernador sa Talibon gumikan sa laing mahinungdanon ug dinali-an nga tigum o biyahe.

Gibutyag ni Chatto ang plano sa posible sab nga pagtukod og Governor’s Sub-Office sa Tersero Distrito.

Nahisakop sa Segundo Distrito ang Talibon, diin sab nahimutang ang labing dakung tambalanan nga gidumala sa kagamhanang probinsiyal.

Embahador sa Espanya midayeg sa kamaabi-abihon sa mga Bol-anon

Midayeg ug mapasalamaton ang embahador sa Espanya nga si Luis Arias-Romero sa kagamhanang probinsyal sa Bohol sa matud niya talagsaong pag-abi-abi kanila sa pagdunggo sa Galeon Andalucia sa baybayong Bol-anon.

Ang kamatinagdanon sa mga Bol-anon mitatak sa panumduman sa embahador ug mga tripulante sa galleon nga nidunggo sa Loon Bohol International Cruise Ship Port ug pantalan sa Tubigon niadtong Oktubre 23 hangtud sa 27.

Nalingaw kaayo sila bisan sa hamubo nilang pag-bisita sa Bohol diin usab sila nakahigayon sa pagsuroy-suroy.

Ang galleon atua na karon sa Singapore nga maoy katapusan nilang dunggo-an sa di pa molahus balik sa Seville sa Espanya.

Gilawig sa replika sa karaang barko sa mga Katsila ang Indian Ocean, Red Sea ug Mediterranean Sea nga kabahin sa kalibutanong rota sa patigayon sa antik nga panahon. (Leah/EDCom)

Bohol nagpabilin nga flagship tourist destination sa Pilipinas

NAGPABILIN ang Bohol sa mga nag-unang destinasyon o flagship destinations sa nasud nga naglakip sa Palawan, Boracay, Baguio ug Camarines Sur.

Ang Bohol kanunayng gi-promote ngadto sa lokal ug kalibutanong merkado sa turismo sumala sa Department of Tourism (DOT) ug kini gidasunan ni Jo Cabarrus sa Bohol Tourism Office.

Napanglantawan nga modugok og samot ang mga turistang Intsik human gihan-ay sa Philippine Consulate ang tigum sa promosyon ug marketing uban sa Chinese travel and tour sector atol sa eksposisyon didto sa Tsina.

Giila ug gikauyonan sa maong tigum nga apil sa nag-unang destinasyon ang Bohol kay kini paborito sa mga turistang Intsik gikan sa mainland China.

Kanit niini nagtambayayong karon ang DOT ug JICA sa pagmugna og labing kasaligang sistema sa paghipos og mga datos sa tourist arrival ug ubang statistics nunot sa standard sa United Nations - World Tourism Organization (UNWTO). (Leah/EDCom)

300 ka mga “bata ni Rizal” gikan sa nagkalainlaing dapit sa Kabisay-an ang magtapok sa Bohol karong Sabado

TRES SIENTOS (300) ka mga batan-on sa kalihukang Kabataang Pangarap ni Rizal (KAPARIZ) gikan sa nagkalainlaing dapit sa Kabisay-an ang magtapok sa Bohol karong Sabado (Nov. 13).

Sila magbansaybansay alang sa transformational leadership uban ang mga sakop sa Bohol Alliance of Student Councils (BASC) sa Pilgrim Heritage Center sa Dauis.

Kini agig pag-ugmnd sa katakus sa kabatan-onan karon aron mahimong responsable, abtik, seryoso ug epektibo nga mga lider sa umaabot.

Pormal nga giimbitar sa KAPARIZ ug BASC si Gob. Edgar Chatto isip keynote speaker gumikan sa matang sa iyang liderato nga giidolo di lang sa Bol-anong kabatan-onan.

Ang Kabataang Pangarap ni Rizal maoy official youth arm sa Order of the Knights of Rizal, usa ka organisasyon nga gimando sa Akta Republika 646.

Magtukod og kooperatiba ang mga tigtanum og utanon ug ubang pagkaon pinaagi sa harden sa Bohol

MAGTUKOD og kooperatiba ang mga magtatanum og utanon ug ubang pagkaon pinaagi sa garden.

Gipailawom sila sa usa ka cooperative pre-membership seminar pinaagi nila ni Niza Cagulada ug Neria del Rosario sa Cooperative Development Authority inabagan ni Helen Igot sa Institutional Development Section sa buhatan sa agrikultura sa probinsiya.

Kini nasubay sa adbokasiya ni Gob. Edgar Chatto nga Bahay Kubo – Food Always In The Home kon Bahay Kubo – FAITH tumong sa sigurong pagkaon sa matag panimalay ug dugang panginabuhi.

Ang tukoron nga gardeners’ cooperative sa Bohol gipangulohan sa chairperson sa hunta direktiba niini nga si Villas Lourdes ug vice chairperson Elime Flores.

Christmas Bazzare sa kapitolyo buksan ning semanaha

BUKSAN sugod ning semanaha sa atubangan sa kapitolyo ang Christmas Bazarre nga moladlad sa mga pagkaon sa Pasko ug matahum nga mga parol.

Ang mga produktong ginama sa Bohol Micro Agri-processors for Development (Bohol-MADe) maglakip sa banana chips, salabat, corn coffee, mga pickles, mushroom pies, cake, pizza ug daghan pa.

Ang gara-on nga mga parol nga ginama sa mga priso sa kanhi BDRC ug karon Bohol District Jail modugang sa kamabolokon sa Capito Christmas Bazzarre nga gipaabot nga dugokon sa mga mamalitay.

Ang lami nga mga pagkaon ginama gikan sa mga abot sa uma nga gigamitan og organic nga abono mao nga way kemikal nga sagol.

Ang Christmas Bazarre sa kapitolyo mohangtud sa Disyembre 20 sumala sa buhatan sa agrikultura sa probnisiya nga nagpasiugda niini uban sa Bureau of Jail Management and Penology.

Hugpong sa mga magpapatigayon, tigkrusada sa kalikopan ug dive guides sa Panglao nanumpa kang Gob. Edgar Chatto

NANUMPA kang Gob. Edgar Chatto sa linangkub nga seremonya kagahapon (Martes, Nob. 9) ang managlahing opisyales sa bag-ong natukod nga Panglao Business Club (PBC), Panglao Nature Advocates (PANA) ug Bohol Dive Guides (BDG).

Ang PBC bag-ong hugpong sa mga batan-ong magpapatigayon nga naglantaw sa hingpit nga pag-ugmad sa ilang sektor ug kabulahanan sa mga Panglaoanon.

Ang PANA sa laing bahin nagkrusada sa tukmang pagdumala sa kalikopan ug responsableng paggamit sa rekursos naturales alang sa malungtarung kalambuan.

Nag-unang tumong sa grupong BDG ang pag-ugmad sa kalidad ug pagpasaka sa standard sa serbisyo sa mga tourist diving guides.

Pormal nga giimbitar ang gobernador isip inducting officer sa tulo ka grupo ug ilang gipasalig ang hugot nga suporta sa administrasyong Chatto, ilabi na sa programa sa panrabaho ug panginabuhi sa turismo.

Lokal ug langyawng panrabaho itanyag sa jobs fair sa probinsiya sa Nob. 27

Daghang kahigayonan sa lokal ug langyawng panrabaho ang itanyag sa jobs fair sa kagamhanang probinsyal pinaagi sa Bohol Employment and Placement Office (BEPO) uban ang Department of Labor and Employment (DOLE) ug Philippine Overseas Employment Administration (POEA) karong Nobiyembre 27.

Gi-awhag ang tanang intresadong aplikante nga moparehistro sa BEPO, DOLE-PEU Bohol o sa Public Employment Service Office (PESO) sa kalungsoran alang sa registration cards.

Mokabat og 16 ka mga recruitment agencies gikan sa Sugbo ug Manila ang moapil sa jobs fair nga himoon sa ICM Activity Center dinhi sugod sa alas 8 sa buntag hangtud sa alas 5 sa hapon sa Nobiyembre 27.

Ang jobs fair motanyag og mga trabaho kalabot sa konstruksyon, engineering, medical/nursing, hotel ug restaurant, retailing, domestic housekeeping, sales ug manufacturing, BPO call center, banking ug finance, ug general administrative.

Ang mga aplikante kinahanglan magdala og resume/bio-data, 2x2 ID picture, diploma/transcript of records, training and employment certificate, passport, ug NBI clearance. (leah/EDCom)

Pres. CPG ug Gov. EMC Chess Tournament buksan sa alas 10:30 karong buntag

BUKSAN and duha ka adlaw nga 2010 Pres. Carlos P. Garcia Chess Challenge ug Gov. Edgar M. Chatto Chess Cup sa Casa Reyfrancis Pension House sa dalan Burgos ning syudad sa alas 10:30 karong buntag (Miyerkoles).

Ang ubang intresadong mosalmot sa kompetisyon puwede pang moapas sa deadline sa rehistrasyon hangtud karong alas 9:00 sumala sa Bohol Chess Players Association.

Gikatakdang mamulong ang gobernador sa pagbukas sa torneyo nga ipahinungod sa ika-114 nga CPG Day nga saulogon ugma. Si Chatto mao say motunol sa mga ganti sa pagtak-op sa torneyo ugma sa gabii.

Gawas sa pagtagik og mga balak, ang chess o ahedres giila nga usa sa mga paboritong kalingawan ni Garcia pagpatay sa kalaay.

Ang paghandum sa ika-114 nga CPG Day usa sab ka pag-ila sa kangilngeg sa mga Bol-anon ning tuiga

ANG paghandum sa ika-114 nga CPG Day usa sab ka pag-ila sa kangilngeg sa mga Bol-anon ning tuiga.

Kini gumikan kay ilhon sa maong okasyon ang kadungganan sa mga Bol-anong sila Presidential Lingkod Bayan awardee Teodosia Bernaldez, Ramon Magsaysay awardees Dr. Christopher ug Dr. Victoria Bernido, ug ALIW Best Director awardee Lutgardo Labad.

Ilang naangkon ang maong mga pasidungog sud lang ning tuiga ug kini dakung garbo sa Bohol karon ug sa umaabot pang kaliwatan sumala ni Gob. Edgar Chatto kinsa usa sab ka Presidential Lingkod Bayan awardee sa bise gobernador pa siya.

Pasidunggan sab sa CPG Day ang batan-ong Bol-anon nga sakop sa Philippine team sa World Chess Olympiad ning tuiga nga si Jedara Docena ug ang nitaliwan na nga King of Novelty Song sa nasud nga si Roman “Yoyoy” Villame.

2 ka dagkung haligi sa administrasyon Aquino ang makig-uban sa mga Bol-anon sa ika-114 nga CPG Day

DUHA ka dagkung haligi sa administrasyong Aquino ang makig-uban sa mga Bol-anon atol sa ika-114 nga sumad sa pagkahimugso ni anhing Pres. Carlos Polestico Garcia ugma (Huwebes, Nob 4).

Saksihan ni Kalihim Bro. Armin Luistro sa Edukasyon ang paglusad ni Gob. Edgar Chatto ug ubang opisyales sa probinsiya sa Provincial Education Subsidy Program sa maong okasyon.

Ang proyekto mopalapad sa kahigayonan sa kabus nga kabataan sa pag-angkon og de kalidad nga edukasyon.

Ilusad sab sa probinsiya uban kang kalihim Roman Paje sa Environment and Natural Resources ang Free Patent Residential Titling Project nunot sa Akta Republika 10023.

Dungan sa maong mga kalihukan ang paglusad sa Bohol Arts, Culture and Heritage Code ug pagpirma sa Covenant of Partnership tali sa kapitolyo ug non-government organizations (NGOs).