Gilauman nga matagad ang kakuwangan sa buhatan sa assessor sa probinsiya sud sa administrasyon ni Gob. Edgar Chatto

MALAUMON si Provincial Assessor Eddie Orig nga matagad ang mga nag-unang kakuwangan sa iyang buhatan sud sa administrasyon ni Gob. Edgar Chatto.

Hangyoon sa provincial assessor ang gobernador alang sa dugang nga mga tawo ug kahimanan sama sa kompyuter ug artificial intelligence imaging device nga magamit sab sa ubang opisina.

Matud sa assessor importante kaayo ang scanning ug imaging sa mga daang records ug kompyuterisasyon sa mga folder sa tax declaration nga maglakip na sa mga supporting documents aron ika-isyu ang mga sertipiko sud lang sa 15 segundos.

Nakita ni Orig ang panginahanglan alang sa resolusyon sa Sangguniang Panlalawigan nga magtugot sa assessor sa pag-isyu og electronic copy sa mga sertipiko kalabot sa real property tax information system general revision.

Hangyoon sab ni Orig si Chatto aron may kolektor sa assessor’s office gikan sa buhatan sa mamahandi sa probinsiya alang sa mas episyenteng serbisyo.