Kapitolyo butangan ni Gob. Chatto og ambulansiya

BUTANGAN ni Gob. Edgar Chatto og usa ka ambulansiya ang kapitolyo aron aduna dayoy magamit sa panahon sa emerhensiya.

Kini nakita ni Chatto nga usa sa mga kakuwangan sa kapitolyo diin nag-okupar ang hilabihan ka daghan nga mga kawani, gawas pa sa publiko nga adunay tuyo sa nagkalain-laing buhatan niini.

Ang ambulansiya maggikan sa Philippine Charity Sweepstakes Office, ahensiya nga nahimong suod ni Chatto sa iyang siyam ka tuig nga pagka kongresista.

Agig suporta sa plano, gipasar sa hunta probinsiyal ang resolusyon nga nag-awhag sa PCSO sa paghatag og bag-ong yunit sa ambulansiya ngadto sa kagamhanang probinsiyal.