Seleksyon sa labing ngilngeg nga konseho batok sa rabies ilusad ni Gob. Edgar Chatto sa pagbukas sa Sandugo Agri-Fair karong buntag

ILUSAD ning buntaga (Miyerkoles, Huylo 21) ang seleksyon sa labing epektibong Rabies Prevention and Eradication Council sa lungsod ug barangay sa tibuok probinsiya sa Bohol.

Kini tawgon og Gov. Edgar M. Chatto Awards nga ilusad atol sa pagbukas ning buntaga sa usa ka semana nga Sandugo Agri-Fair sa compound sa Office of the Provincial Veterinarian ug Office of the Provincial Agriculture.

Itunol ni Chatto sa samang kalihukan ang ayuda ngadto sa onse (11) ka mga people’s organizations nga aprubado sa Agricultural Facilities Credit Assistance Project (AFCAP) ug Income Generating Activities (IGA) Program.

Ang maong mga kalihukan mohatag og dugang kahulogan sa pagbukas sa Sandugo Agri-Fair nga mosugat sa pagsaulog ugma, Hulyo 22, sa ika-156 nga sumad sa Probinsiya sa Bohol o Bohol Day Celebration.

Ang Sandugo Agri-Fair, pagtunol sa suporta ngadto sa mga people’s organizations ubos sa Lets Help Bohol ug LIFFE Programs, ug ang seleksyon sa labing epektibong anti-rabies councils sa Bohol gisuportahan sab sa hunta probinsiyal pinangunahan sa presiding officer niini nga si Bise Gob. Concepcion Lim.