Repasohon ang tourism code sa Bohol kay kini wa gani implementing rules and regulations

KINAHANGLANG repasohon ang tourism code sa probinsiya kay gani wa kini implementing rules and regulations sumala ni Gob. Edgar Chatto.

Laing tumong sa pag –review ang pagpahaum niini ngadto sa Tourism Act of 2009, balaod kansang principal author mao mismo si Chatto kinsa chairman sa komiteba sa turismo kaniadto.

Posible nga isukip sa tourism code sa Bohol aron mahimong permanente ang mga mahinungdanong probisyon sa mga executive orders sa nangaging administrasyon sa kapitolyo.

Mugna-on ang research unit sa kagamhanang probinsiyal aron mosusi sa mga teknikalidad tumong sa tukmang lehislayon sa kaugmaran sa turismo sa Bohol.

Kining tanan maapil sa mga estratehiya nga napanglantawang ilatid atol sa tourism summit sa Septiyembre kanus-a saulogon sab ang Tourism Month.