Buot ni Gob. Edgar Chatto nga magpondo ang mga hepe sa buhatan sa kapitolyo atol sa People’s Day matag Lunes

BUOT ni Gob. Edgar Chatto nga anaa gyud ang mga hepe sa buhatan sa kapitolyo atol sa People”s Day matag Lunes.

Mopagawas og kamandoan ang gobernador tumong niini aron matagad ang katawhan nga may tuyo sa kapitolyo. Ang kapitolyo gitawag karon ni Chatto og balay mismo sa katawhan.

Matud sa gobernador kinahanglang way hepe sa mga buhatan nga mobiyahe sa maong adlaw gawas lang kon adunay importanteng opisyal nga lakaw ug ubang balido nga hinungdan.

Buot sab sa gobernador nga himoong sumbanan sa pagtagad ngadto sa katawhan ang gitawag niya og WARM nga nagkahulogan og willing, able, ready ug moving.

Kini nagpasabot nga puno sa kasibot, makahimo, andam ug abtik ang mga hepe sa buahatan sa probinsiya sa pag-atubang ug pag-atiman sa publikong Bol-anon.