GAWAS kang Pres. Noynoy Aquino, pormal sab nga i-update ni Gob. Edgar Chatto si Bise Pres. Jejomar Binay sa Panglao Bohol International Airport Project.
Kini agig pormal nga pagdasun sa pagtuki sa maong isyu atol sa pagpakigtagbo ni Binay kang Chatto, ubang opisyal sa probinsiya ug mga mayor sa People’s Mansion niadtong Domingo.
Inisyal nga gituki sa gobernador ug sa presidente mismo ang maong proyekto atol sa ilang hamubo apan mahinungdanong panagsulti sa Heroes Hall sa Malacanang semana sa wa pa ang State of the Nation Address sa pamuno-nasud.
Ang gidamgong tugpahanan sa Panglao napanglantawang makapalagsik sa ekonomiya sa Bohol ug tibuok rehiyon, gawas pa nga kini labawng gikinahanglan sa nagkamodernong panahon.
Daghan sa mga Bol-anon ang nidasun nga ang hagip-ot ug lisud na nga ugmarong tugpahanan sa Tagbilaran hilabihan ka delikado ngadto sa gamay ug nagpadayon sa pagkahuot nga dakbayan.
Human kini nakonsepto ug unang gilihuk 20 ka tuig na ang nilabay, gilauman nga ang Panglao airport project makalupad na ngadto sa konkretong katumanan.
No comments:
Post a Comment