Mipasalig si Bise Pres. Jejomar Binay nga suportahan ang mga programa sa pabalay o housing program sa Bohol

MAKAPAHIMULOS ang probinsiya sa Bohol sa national housing program sumala ni Bise Pres. Jejomar Binay.

Kini gipadayag sa bise presidente sa tigum uban kang Gob. Edgar Chatto, mga sakop sa hunta probinsiyal, mayor, bise mayor ug uban pa sa Conference Room sa People’s Mansion kagahapon, Domingo, Hulyo 25.

Dili ka partido si Binay ug si Pres. Noynoy Aquino apan gitudlo gihapon siya sa presidente isip hepe sa national housing council.
Nisaad si Binay nga mobalik sa Bohol sa di madugay kalabot sa iyang gipasalig nga suporta sa mga proyekto sa pabalay.

Sa wa pa nibisita dinhi ang bise presidente, si Chatto gipasaligan nang daan ni Pres. Aquino mismo nga suportahan ang mga programa sa kalambuan sa Bohol.

Nagkasulti si Chatto ug Aquino sa Heroes Hall sa Malacanang sa niaging semana ug gani atu na sab ang gobernador sa kaulohan ning adlawa alang sa State of the Nation Address sa presidente.