Nagmotorkada dinhi sa syudad ang Provincial Health Office ug Provincial Nutrition Council agig pagsaulog sa Nutrition Month ning buwan sa Hulyo.
Matod ni nutrition coordinator Juliet Manliguez, daghan pang kalihokan ang giandam sa PHO ning buwana ug usa niini ang mass feeding sa Hulyo 23 nga pangabagahan sa Nutritionist-Dietitian Association of the Philippines (NDAP) – Bohol Chapter.
Sumala ni Gob. Edgar Chatto, mahinungdanon ang tukmang pagkaon kay bahandi sa Bohol ang himsog nga Bol-anon, ug nga ang himsog nga katawhan makalagsik sa kaugmaran.
Sa Hulyo 30, nga maoy itak-op sa Nutrition Month, magpasiugda ang Insumix og recipe contest nga apilan sa mga barangay nutrition scholars sa tibuok lalawigan sa Bohol.
Ang mga tigpamaba sa PHO maoy dinapit nga mohisgot sa kamahinungdanon sa nutrisyon atol sa kapihan sa PIA sugod karong Huwebes ug sa mosunod nga mga Huwebes ning buwana.
Ang matag lungsod sa Bohol nagsa-ulog usab sa Nutrition Month pinaagi sa mga kalihokan nga pinangunahan sa mga Municipal Health Office ubos sa pagdumala sa PHO. (JONA/EDCom)
No comments:
Post a Comment