Gisaad ni Sen. Francis “Kiko” Pangilinan nga una niyang tukion og hatagan sa pagtagad ang katukoran sa Panglao International Airport sa panahon nga molingkod na unya siya isip bag-ong pangulo sa Senado.
Kini iyang gipalanog atol sa iyang pakighinabi ni Gob. Edgar Chatto sa kalit niini nga pagbisita dinhi sa Bohol, atol sa gipahigayong pagbukas sa 3 ka adlaw nga stay-in seminar alang sa Strategic Planning Workshop for the Executive-Legislative Departments didto sa Bohol Plaza Resort.
Matod pa niya nga isip usa ka sulogoon, ang katawhan nagpaabot sa tinud-anay nga serbisyo nga iya usab nga ikapaambit.
Matod sa senador nga dako ang iyang pagsalig kang Gov. Edgar Chatto tungod sa katakos niini pagduma sa lalawigan labi na sa iyang gugma sa katawhang Bol-anon og iya kining tabangan aron magmalamposon ang programa niini alang sa Bohol labi na kong siya na ang presidente sa Senado.
Gidugang sa senador nga prayoridad niya ang pagsugod sa katukoran sa tugpahanan sa Panglao aron molambo og dugang ang turismo dinhi sa atong lalawigan og makatabang unya kini sa katawhan nga walay trabaho og nag-antos sa tumang kalisod.
Si Pangilinan midugang nga gamay lang ang gikinahanglan nga usabon sa maong proyekto og masugdan na kini sulod sa termino ni Chatto. Dugang usab nila nga gihisgutan mao ang kaugmaran sa agrikultura.
Kahinumdoman nga suod nga managhigala ang senador og si Chatto sa dihang usa pa kini ka kongresista sa unang distrito sa Bohol. (CHRIS REQUERON III)
No comments:
Post a Comment