BUOT ni Gob. Edgar Chatto ug Police Regional Director Laneo Nerez nga lig-onon ang tourist police sa Bohol ug himoong ehemplo sa rehiyon.
Gipalanog sa bag-ong gobernador sa Bohol ang hugot nga suporta sa tourist police isip mahinungdanong yunit sa kalinaw ug kahusay ning probinsiyang nag-una sa turismo.
Matud sa hepe sa kapolisan sa Central Visayas, adunay mga tourist police nga idestino sa Sugbo, Negros Oriental ug Siquijor ginamit ang tourist police system sa Bohol isip sumbanan.
Nagtagbo si Chatto ug Nerez sa pagbukas sa Tourist Police Basic Course Seminar dinhi sa syudad sa Tagbilaran niadtong lunes, unang adlaw sa labing unang semana sa ika-25 nga gobernador sa Bohol.
Komon ang obserbasyon sa gobernador ug hepe sa PNP sa rehiyon nga ugmaron gyud ang kapasidad sa mga tourist police aron padayong di magpanuko ang mga turista sa pagbaha nganhi sa Bohol.
Ang turismo giila nga usa ka pwersadong makina nga motampo sa pagpaandar sa ekonomiya, ilabi na sa lokal nga panrabaho ug panginabuhi, sumala ni Chatto kinsa kanhi tsirman sa komiteba sa turismo sa Kongreso.
Sa iyang kabahin pinangga ni Nerez ang Bohol kay siya dugong Carmenanon. Gani si Nerez nahimo sab nga hepe sa PNP sa Bohol sa dihang si Chatto maoy bise gobernador ni kanhi Gob. Rene Relampagos, kinsa kongresista na karon sa Unang Distrito.
No comments:
Post a Comment