Conching Lim padayong mipahimutang sa mga gimbuhaton tumong sa mas hapsay nga serbisyo isip bise gobernador

NAGPADAYON si Bise Gob. Concepcion Lim sa tukmang pagpahimutang sa mga gimbuhaton sa iyang buhatan ug sa hunta probinsiyal halos usa ka buwan sukad sa iyang paglingkud uban kang Gob. Edgar Chatto.

Matinud-anong giangkon sa babayeng bise gobernador ang kadaghan pa sa angayng himoon sa matag adlaw sa iyang pagtungha sa kapitolyo isip ikaduhang labing gamhanang opisyal sa probinsiya.

Usa sa iyang gigahinan og panahon ang pagtagad sa buot manrabaho sa kapitolyo samtang gitambongan ang daghang opisyal nga tigum o kalihukan.

Lakip niini ang mga tigum sa pag-ugmad sa kapasidad sa nagkalain-laing buhatan sa kagamhanang probinsiyal.

Apil sab niini ang pagpahiluna sa mga kawani tugbang sa ilang kahibalo ug pagpakunhod sa mga kaswal sa pagkakaron nga daginoton ang pondo sa probinsiya human sa eleksyon.

Nanghinaut ang bise gobernador nga mosabot ang katawhan kay ang mga paningkamot sa administrasyon sa probinsiya para ra sab sa kabulahanan sa mga Bol-anon. (LEAH/EDCom)