GISUGDAN ang tulo ka adlaw nga komprehensibong strategic planning workshop sa kagamhanang probinsiyal pinangunahan mismo nila ni Gob. Edgar Chatto ug Bise Gob. Concepcion Lim sa Bohol Plaza kagahapon, Miyerkoles.
Apil sa workshop ang mga sakop sa hunta probinsiyal, hepe sa mga departamento ug ubang naghupot og mahinungdanong katungdanan sa kapitolyo.
Usa sa mga tuyo niini ang pagtino sa direksyon sa bisyon, misyon ug tumong para sa Bohol isip usa ka prime eco-cultural tourism destination ug balanced agro-industrial province.
Ilatid sa planning workshop ang tukmang estratehiya sa kinatibuk-ang programa nga gitawag ni Chatto og LIFE HELPS nga nagkahulogan og Livelihood, Infrastructure, Food, Education, Health, Environment, Leadership development, Peace and Order, ug Sports and youth development.
Hinuon tutokan sa unang usa ka gatos ka adlaw sa gobernador ang gitawag niya og HEAT nga nagpasabot og Health, Education, Agriculture ug Tourism.
Ilhon sab sa planning workshop ang mga palisiyang pandayon sa lehislatura sa kapitolyo agig suporta sa mga proyekto ug programa sa bag-ong administrasyon sa probinsiya.
No comments:
Post a Comment