Nahimugso ang dugang damgo sa kaugmaran sa probinsiya nga gitawag mismo og DREAMS Project

NAHIMUGSO ang dugang damgo sa kaugmaran sa Bohol nga mihaum sa tawag nga DREAMS Project.

Ang DREAMS nga gilusad sa kadagkuan sa probinsiya pinangulohan ni Gob. Edgar Chatto nagkahulogan og Development of Resources and Access to Municipal Services.

Lima ka lungsod ang pilot areas sa inisyal nga implementasyon niini ug kini mao ang Maribojoc ug Tubigon sa Unang Distrito, Talibon sa Segundo Distrito, ug Jagna ug Pilar sa Tersero Distrito.

Nitambong ang mga nag-unang lider sa natungdang mga lungsod atol sa paglusad sa proyekto.

Ang DREAMS Project mogamit og mga teknolohiya o pamaagi sa kalambuan aron mas ikahatud ang serbisyo diin kini gikinahanglan.

Kini estratehiya sa pagdala sa kagamhanang probinsiyal ngadto sa kalungsoran aron mas duol ug tataw sa katawhan ang bisyon para sa Bohol isip nag-unang eco-cultural tourism destination ug lalawigan nga may balanseng agrikultura ug industriya.