Chatto mipasalamat sa tanang miduyog sa iyang damgong maggobernador

GIPASALAMATAN ni Gob. Edgar Chatto ang tanan nga niduyog sa iyang damgo nga mosilbe isip gobernador sa lalawigang Bol-anon.

Iya sab nga gipasalamatan ang mga tawo nga labing suod sa iyang dughan ug nakatandug sa iyang kinabuhi.

Tataw nga kahilakon ang 50 anyos nga gobernador sa dihang iyang ginganlan ang pipila kanila nga naglakip sa iyang magtutudlo sa Grade I ug usa ka principal sa hayskul nga nagdasig kaniya sa pagkab-ot gyud sa iyang pangandoy.

Daw molukso na gyud ang iyang luha sa dihang gipasalamatan sab ni Chatto ang usa ka pari nga diha sa iyang kiliran atol sa usa ka higayong nakigbugno siya sa kamatayon.

Kadto nahitabo human naaksidente ang iyang gisakyan sa Baclayon gikan sa usa ka kalihukan sa Kabataang Barangay sa Ubay kaniadto. Siya maoy presidente sa KB sa Bohol niadtong higayona.

Gani pipila sa nakasaksi sa maong disgrasya ang wa nagtoo nga mabuhi pa ang karon usa na sa labing takus nga lider sa kasaysayan sa Bohol.