Adto na opisyal nga mag-opisina sa People’s Mansion si Gob. Edgar Chatto apan anaa gihapon siya sa kapitolyo matag Lunes kay People’s Day

ADTO na opisyal nga mag-opisina sa People’s Mansion si Gob. Edgar Chatto gawas lang sa adlawng Lunes nga iyang gigahin alang sa People’s Day sa iyang buhatan sa kapitolyo.

Didto sa gitawag niya og Mansion Office of the Governor atimanon ni Chatto ang opisyal nga gimbuhaton ug atubangon ang mga opisyal nga bisita, lakip na ang mga dignitaries.

Ang maong buhatan nga nahimutang sa tuo nga bahin sa silong sa People’s Mansion gibendisyonan kagahapon, Domingo, Hulyo 25, uban ang labing una niyang opisyal nga bisita nga si Bise Pres. Jejomar Binay.

Didto sab ang mga sakop sa hunta probinsiyal, mayor ug bise mayor. Anaa sa People’s Mansion ang buhatan sa liga sa mga mayor hasta na sab ang opisina sa liga sa mga bise mayor.

Hamugaway ang opisina ni Chatto sa silong sa People’s Mansion ug mas sayon kini para kaniya kay dayag sa katawhan nga ang gobernador may diperensiya sa paglakaw gumikan sa sakit nga polio sa bata pa siya.

Hinuon giklaro sa gobernador nga makig-uban gyud siya sa katawhan didto sa kapitolyo kon adlawng Lunes kay kini iya nang gideklarar nga People’s Day.