Unang ARC Cluster sa Central Visayas sa panahon ni Pres. Aquino gilusad sa lungsod sa gobernador sa Bohol

GILUSAD sa Balilihan, lungsod ni Gob. Edgar Chatto. ang labing unang Agrarian Reform Community (ARC) Cluster sa Tunga-tungang Kabisay-an sa administrasyon ni Pres. Noynoy Aquino.

Kini giatol sa ika-182 nga Sumad sa Balilihan nga gitambongan mismo ni DAR Asst. Sec. for Finance, Management and Administration Felix Perry Villanueva, Reg’l. Exec. Dir. Rudy Inson, DENR Reg’l. Dir. Leonardo Sibbaluca, Gob. Chattto, ubang opsiyal sa probinsiya, Mayor Dominisio Chatto, Bise Mayor Efren Chatto ug uban pa.

Ang proyekto sa daghang aspeto sa kaugmaran gitawag og CABATUANS ARC Cluster nga naglangkub sa Catigbian, Balilihan, Tubigon, Antequera ug San Isidro.

Kini mopalapad sa kalambuan nga napahimutang na sa Balilihan, Catigbian ug Balilihan nunot sa nahaunang programa sa ARC sa maong mga lungsod ug mopatuman sa mga bag-ong proyekto sa Antequera ug San Isidro.

Giila sa kadagkuan sa DAR ang suporta ni Chatto sa programang agraryo sukad sa kongresista pa siya.

Gilagdaan ang kasabotan sa CABATUANS ARC Cluster uban sab nila ni Mayor Roberto Salinas sa Catigbian, Dominisio Chatto sa Balilihan, William Jao sa Tubigon, Jose Mario Pahang sa Antequera ug Jacinto Naraga sa San Isidro.