Ikaupat nga buhatan ni Gob. Chatto inagurahan sa Talibon atol sa CPG Day

INAGURAHAN ang ikaupat nga buhatan ug ikatulong extension office ni Gob. Edgar Chatto didto sa Talibon nga tawgon og Bohol Provincial Capitol in the North atol sa CPG Day sa Nobiyembre 4.

Kini maoy labing unang higayon nga ang gobernador sa Bohol adunay buhatan sa norteng bahin sa lalawigan, partikyular na sa Talibon nga mao say yutang natawhan ni anhing Pres. Carlos P. Garcia.

Ang inagurasyon sa Nobiyembre 4 matunong sa ika-114 nga sumad sa pagkahimugso ni Garcia kinsa natawo sa sityo Luy-a, barangay San Jose sa Talibon.

Ang Capitol in the North naglangkub sa tibuok ground floor sa usa ka building sud sa municipal hall compound sa Talibon diin adto mag-opisina si Chatto matag karon ug unya.

Kini maoy ikaupat nga buhatan sa gobernador apil na ang naandan nga opisyal nga opisina niini sa kapitolyo, ang iyang extension office sa People’s Mansion, ug ang pag-opisina ni Chatto sa devolved hospital sa probinsiya matag karon sab ug unya.

Kini gituyo aron masiguro nga aduna gyuy regyular nga panahon sa pagdala sa gobernador sa kagamhanang probinsiyal ngadto mismo sa katawhan.