Amerikanong beterano sa Vietnam War napalgan sa Ubay human sa dugayng pinangita kaniya sa iyang pamilya sa Estados Unidos

NAPALGAN dinhi sa Bohol ang Amerikanong beterano sa gubat sa Vietnam human sa taas nga katuigang pinangita kaniya sa iyang igsoon nga atua sa Estados Unidos.

Natultolan ang kanhi US Air Force mechanic sa Vietnam War nga si William Steel sa Bood, Ubay diin siya naminyo ug nagpuyo uban sa Bol-anong si Jacinta Celeste sukad sa 1969 o 41 ka tuig na ang nilabay.

Gimandoan ni Gob. Edgar Chatto ang tagdumala sa OFW Desk sa kapitolyo nga si Reine Augusto Real human ni-email gikan sa Amerika ang igsoon ni Steel nga si Robert ngadto sa EDCom aron tabangan nga mapalgan ang iyang igsoon sa Pilipinas.

Ang EDCom kon Effective Development Communication maoy press bureau o media unit sa kagamhanang probinsiyal ubos sa buhatan sa gobernador.

Dihadiha nga gipahibawo sa kapitolyo pinaagi sa e-mail si Robert Steel nga napalgan na sa Ubay ang iyang igsoon apan kinsa wa nay kinabuhi kay si William namatay sa sakit sa kasingkasing niadto pa lang gyung Septiyembre 17 sa edad nga 68.

Yoyoy Villame pasidunggan sa probinsiya atol sa CPG Day
---------------------------------------------------------------------------------------------------------------------
PASIDUNGGAN sa kagamhanang probinsiyal ang Bol-anong giila nga King of Novelty Songs sa Pilipinas nga si anhing Yoyoy Villame.

Kini i-atol sa pagsaulog sa Nobiyembre 4 sa laing kasumaran sa pagkahimugso ni Pres. Carlos P. Garcia, ang una ug bugtong Bol-anong pamuno-nasud.

Ang posthumous award itunol ngadto sa banay ni Villame agig pag-ila sa kontribusyon sa maong Bol-anon ngadto sa Pilipinhong arte ug kultura pinaagi sa iyang agik-ik nga musika ug makalingaw nga mga awit.

Si Villame usa lang ka yanong konduktor sa de pasaherong trak nga MB Liner kaniadto hangtud nga nadiskubre ang iyang talento.