Libo-an ka mga Bol-anon ang makasaka sa Katsilang galleon kada adlaw atol sa 3 ka adlaw nga pagdunggo niini sa Bohol

LIBO-AN ka mga Bol-anon ang gipaabot nga mosaksi ug makasaka mismo sa Andalucia Galleon matag adlaw sud sa tulo ka adlaw nga pagdunggo niini sa Bohol isip kabahin sa paghandum sa Spanish galleon trade sa kalibutan sa karaang panahon.

Ang replica sa karaang barko sa Katsila modunggo sa giugmad nga Catagbacan international cruise ship port sa Loon sa Oktubre 23-25 human kini mohapit sa Manila ug Sugbo gikan sa Espanya.

Giluwatan ni Gob. Edgar Chatto sa dayon niyang lupad sa Tsina niadtong Domingo ang usa ka memo-advisory nga nagdasig sa tanang opisyal ug kawani sa probinsiya sa pagsaksi sa talagsaong okasyon.

Galleon ang gisakyan sa Katsilang si Miguel Lopez de Legaspi sa pagdunggo sa isla sa Bohol kapin sa 400 na ka tuig ang nilabay diin ug kanus-a gihimo uban kang Datu Sikatuna ang Sandugo o Blood Compact, ang labing unang tratado tali sa mga puti ug tabonon sa kalibutan.

Matud ni Gob. Chatto ang gikahinaman nga labing unang pagdunggo sa galleon sa Bohol ning modernong panahon nagsaad og dugang kabulahanan sa turismo ug kaalam sa kultura ug edukasyon.