MAINITONG gihangop si Gob. Edgar Chatto ug kaubanan sa kadagkuan sa Jiangxi diin lig-onon ang katali-an sa maong probinsiya sa Tsina ug Bohol tumong sa turismo ug ubang natad sa kalambuan.
Ang delegasyon sa Bohol anaa karon sa Mt. Lushan sa Jiangxi diin gihimo ang 2nd World Famous Mountains Conference nga naglakip sa Stamp Exhibition diin gipasundayag ang Chocolate Hills ug ubang atraksyon sa Bohol.
Gihisgotan ni Chatto, kadagkuan sa Jiangxi ug tigpasiugda sa kalibutanong konperensiya ang turismo, investment, ug epektibong pagdumala sa kalikopan.
Pormal nga giimbitar sa kagamhanan sa Jiangxi, Tsina ug World Famous Mountains Association ang gobernador uban ang iyang kapikas ug First Lady sa Bohol nga si Pureza, Provincial Administrator Alfonso Damalerio II, Provincial Engr. Rosalinda Yu, Bohol Employment and Placement Office head Romulo Tagaan ug Carmen Mayor Cheche Toribio-Delos Reyes.
Ang delegasyon nitugpa sa Shanghai niadtong Domingo sa gabii ug gisugat ni Philippine Special Envoy to China Carlos Chan, kinsa hugot nga nagsuporta sa paghimsog sa turismo ug kultura sa Bohol.
No comments:
Post a Comment