Information officer sa kalungsoran magtigum karong udto uban sa gopbernador

MAGTAGBO ang mga information officer sa tibuok probinsiya karong udto (Martes, Oktubre 5) alang sa mas epektibo nga pagsabwag sa tukmang kasayuran ngadto sa katawhan.

Kini agig tubag sa direktiba ni Gob. Edgar Chatto ngadto sa mga mayor sa pagtudlo og mga public information officer sa tanang lungsod sa Bohol.

Ang gobernador gipaabot nga motambong mismo sa maong tigum kay alang kaniya obligasyon sa kagamhanan ang pagpahibawo sa mga kalihukan niini kay ang katawhan adunay katungod sa pagpakisayud ug katungod nga masayud.

Isip amahan sa probinsiya, buot ni Gob. Chatto nga adunay koordinasyon ang mga public information officer isip kasaligang tinubdan sa katawhan sa mga buhat sa namunoan.