Tukmang matang sa prutas ug teknolohiya sa produksyon makatam-is sa ekonomikanhong kahimtang sa mga Bol-anon

ANG tukmang matang sa mga prutas ug teknolohiya sa produksyon niini napanglantawang makatam-is sa ekonomikanhong kahimtang sa mga Bol-anon.

Suportado sa kagamhanan ang mga programa tumong niini ilabi na kay himsog sab ang klima sa daghang dapit sa Bohol para sa mga prutas nga kaniadto gitoohang sa laing probinsiya lang mosanay sumala ni Gob. Edgar Chatto.

Nunot niini gihangop ni Chatto ang pagpahigayon sa ika-18 nga National Fruit Symposium sa Bohol Island State University diin siya namulong ug nilig-on sa katalian uban sa mga tigprodukto og prutas.

Sama ka mahinungdanon para sa mga Bol-anon ang pormal nga pagtapos didto sa Bohol Agricultural Promotion Center kagahapon sa season-long training kalabot sa tukmang pag-atiman sa mga high-value fruits ingon man utanon.