Nanaug na unta sa abyon dinhi gikan sa Tsina si Gob. Chatto apan diha-diha nga nibalik paglupad kay gitawagan sa Malacañang

MAO pa lang gani niyay pagtugpa sa Tagbilaran airport gikan sa Tsina kagaha[pon sa buntag (Lunes), diha-diha nga nilupad pagbalik si Gob. Edgar Chatto kay kalit nga gitawagan sa Malacañang.

Nanaug na ang gobernador sa eroplano sa dihang kalit siyang gitawagan sa palasyo gumikan sa usa ka mahinungdanong tuyo sumala ni Provincial Administrator Alfonso Damalerio II.

Si Damalerio mao nay nipahibawo niini ngadto sa ubang opisyal ug mga kawani sa probinsiya atol sa senemanang flag raising sa kapitolyo kagahapon.

Apan wa ibutyag sa tuong kamot sa gobernador kon unsay tumong sa dinali-ang tawag sa Malacañang ngadto sa gobernador sa Bohol.

Si Chatto wa na gani nakadiretso sa ilang balay ning syudad. Ang gobernador gikatakdang mahibalik dinhi kagahapon sa hapon o karong buntag kay mangulo sa ikaduhang HEAT Caravan nga himoon didto sa Pilar ning adlawa (Martes).