Gipaabot nga ipadayag ang dugang palisiya sa probinsiya para sa mga senior citizens

GIPAABOT nga ipadayag ang dugang palisiya ug programa sa probinsiya para sa sektor sa katiguwangan o senior citizens sa Bohol ugma (Huwebes, Oct 28).

Magtagbo ang kadagkuan ug sakop sa Federation of Senior Citizens in Bohol pinangulohan sa presidenteng si Melchor Daniel aron tak-opan ang national Elderly Filipino Week nga nahimong usa ka buwan nga kasaulogan dinhi ug ubang probinsiya sa Rehiyon 7.

Pormal nga giimbitar sa pederasyon si Gob. Edgar Chatto isip pinasidunggang mamumulong sa culmination program sa JJ’s Seafood Village ugma nga tambongan sab sa mga mayor, social welfare officers ug pangulo sa komiteba sa senior citizens ug social welfare sa mga konseho sa kalungsoran.

Suportado ni Chatto sukad pa gani sa iyang pagkakongresista ang sektor sa senior citizens pinaagi sa iyang pondo sa mga tambalanan, pagpakig-alayon sa mga nasudnong ahensiya para sa ilang mga benepisyo, ug uban pa.