Gidayeg sa gobernador ang pagsumitir sa mga buhatan sa probinsiya sa ilang accomplishment report sa unang 100 ka adlaw

GIDAYEG ni Gob. Edgar Chatto ang mga departamento sa probinsiya ug nasudnong ahensiya sa Bohol nga nisumitir sa ilang accomplishment report sa unang 100 ka adlaw.

Nalipay niini ang gobernador kay kini nagpasabot sa kasibot ug kahiusahan sa kagamhanan sa pagpadayag ngadto sa katawhan sa mga nabuhat ug angay pang himoon.

Sa wa pa siya nilupad sa Tsina niadtong Domingo, gidasig ni Chatto ang mga buhatan sa kapitolyo sa pagpadayon sa ilang maayong nahimo kay ang unang tulo ka buwan sa bag-ong administrasyon sa probinsiya sinugdanan lamang.

Ang gobernador gipaabot nga subsub nga mo-follow up sa mga proyekto ug programa sa probinsiya nga nagkinahanglan og suporta sa mga nasudnong ahensiya inig balik niya gikan sa Tsina.