Dugang kaso sa mga OFW giaksyonan sa OFW Desk sa gobernador

DUGANG mga kaso sa mga Bol-anong nagtrabaho sa gawas sa nasud ang gisulbad sa OFW Desk sa kapitolyo nga gimugna ni Gob. Edgar Chatto.

Labing ulahi niini ang pagluwas ug pagpagawas kang OFW Jean Rachel Raterta gikan sa kustodiya sa kapolisan sa Sabah, Malaysia diin siya gipatrabaho isip waitress. Ang 21 anyos nga OFW lumad sa Jetafe.

Sa laing bahin, natultolan sa tabang sa OFW Desk ni Chatto ang marinero nga si Rodel Mahinay Cañete kinsa wa na nakontak sa iyang ginikanan human nisakay sa langyawng cargo ship sa niaging Mayo. Si Cañete taga-San Isidro ning syudad.

Nakontak na sab ang OFW sa nasud sa Cyprus nga si Abegail Ongcoy Añana kinsa wa na igdungog sa iyang pamilya. Si Añana nga taga-Inabanga unang nagtrabaho sa nasud sa Taiwan sukad sa 2003 hangtud sa 2006.

Ang kahimtang sa mga OFW usa sa mga special concern nga giaksyonan sa gobernador sud sa unang 100 ka adlaw sa iyang administrasyon. Ang OFW Desk sa kapitolyo gidumala ni kanhi university professor Reine Augusto Real.