LIBO-AN ka mga kahoy ang gitanum sa mga opisyales ug kawani sa kagamhanang probinsiyal didto sa Bayongan Dam sa San Miguel atol sa tinuig nga Family Day sa kapitolyo kagahapon, Biyernes, Oktubre 1.
Ang Capitol Family Day Caravan nga nagsukad sa syudad sa Tagbilaran nihapit sa kalungsoran diin gisabwag ang mga basahon mahitungod sa pag-alkontra sa makalilisang ug makamatay nga dengue.
Gikatahong kadto maoy labing unang Family Day sa kapitolyo nga gipahinungod sa duha ka managlahi apan konektado nga mga kinabuhi---ang kinabuhi sa kalikopan o kinaiyahan ug ang kinabuhi mismo sa tawo.
Ang makahuloganong selebrasyon gipangunahan ni Gob. Edgar Chatto ug Bise Gob. Concepcion Lim human gyud dayon sa senemanang programa sa radyo matag Biyernes sa buntag nga Kita ug Ang Gobernador.
Matud sa gobernador ang pagpananum og kahoy mopahimsog sa kalikopan nga nagsustinir sa pagpakabuhi sa tawo samtang ang katawhan kinahanglan sab nga luwas sa sakit sama sa dengue nga nikalas na gani ning tuiga og 14 ka kinabuhi.
Mahinungdanon alang kang Chatto ang pagtanum og mga kahoy atol sa Capitol Family Day kay siya anak sa lungsod sa Balilihan diin giatiman ang kalikopan.
Mahinungdanon sab kaniya ang pagpatunhay atol sa samang okasyon sa programa batok sa dengue kay 40 na ka tuig ang nilabay sukad nga ang maong sakit nikalas sa kinabuhi sa iya mismong manghud nga babaye.
No comments:
Post a Comment