Napili na ang 10 ka mga finalists nga magsangka sa Sumad Balilihan Singing Idols karong gabii (Martes)

NAPILI na ang 10 ka mga finalists gikan sa nagkalain-laing dapit sa probinsiya nga magkumbati sa prestihiyosong sangka sa mga mag-aawit sa Bohol ning tuiga nga mao ang Sumad Balilihan Singing Idols karong gabii (Martes, Sept. 28).

Ang mga banggiitang amateur singing talents mao sila si Cristal Rose Manuta, Ann Marie Bastasa, Windsor Felisilda, Arvel Mae Felisilda, Rochelle Edo, Albelyn Mae Balatero, Melissa Ann dela Cruz, Roan Marie Vallota, Julius Banal ug Mecerdita Quiachon.

Ang kampeyon mobulsa og P5,000, ikaduhang dapit, P3,000, ug ikatulong dapit, P2,000, samtang adunay consolation prize nga P500 matag usa sumala ni Jundel Danila nga nagdumala sa kompetisyon.

Ang Singing Idols usa sa mga atraksyon sa usa ka semanang kasaulogan sa ika-182 nga Sumad sa Balilihan nga mabolokong taposon ugma, Septiyembre 29.