Ayuda sa panginabuhi gitunol ngadto sa mga mag-uuma sa Carmen nunot sa programang KALAHI

Gitunol ang ayuda sa panginabuhi ngadto sa Villafuerte Carmen Multi-Purpose Cooperative nunot sa programang KALAHI o Kapit Bisig Laban sa Kahirapan sa seremonya sa People’s Mansion niadtong Miyerkoles.

Gikalipay ni Gob. Edgar Chatto ang ayuda ubos sa Integrated Livelihood Development Program sa Department of Labor and Employment kay kini nagmatuod sa makanunayong pagtambayayong sa lokal ug nasudnong kagamhanan para sa kalambuan.

Nag-alayon ang DOLE, Department of Agrarian Reform, Department of Agriculture, kagamhanang probinsiyal ug uban pa sa pagpatunhay sa programa sa KALAHI sa Bohol.

Ang gobernador mao mismoy nangulo sa tigum isip tsirman sa KALAHI Farmers Center – Bohol Convergence for Sustainable and Rural Development atol sa pagtunol sa ayuda sa pnaginabuhi.

Ang KALAHI Farmers Center sa Bohol maoy nahibiling naglihuk nga KALAHI Farmers Center sa walo ka probinsiya inabagan sab sa Philippine-Australia Technical Support for Agrarian Reform and Rural Development (PATSARRD).


Bag-ong buhatan sa liga sa mga bise mayor
gisubhan kagahapon (Huwebes) sa People’s Mansion
---------------------------------------------------------------------------------------------------------------------
GISUBHAN ang bag-ong buhatan sa liga sa mga bise mayor sa Bohol nga nahimutang tupad sa opisina sa liga sa mga mayor sa sud sa People’s Mansion kagahapon.

Ang okasyon gipangunahan ni Vice Mayors’ League of the Philippines – Bohol Chapter president Vice Mayor Efren Tungolh sa Balilihan samtang ang gobernador girepresentahan sa maong kalihukan ni Provincial Administrator Alfonso Damalerio II.

Dakug bentaha para sa mga bise mayor nga anaa na sab sa People’s Mansion ang bilang buhatan sama sa League of Municipalities of the Philippines aron sayon ra kanila ang pagpadangat sa unsa man nga isyu ngadto Kang Gob. Edgar Chatto.

Si Chatto tig-opisina sa People’s Mansion gikan sa Martes ngadto sa Biyernes samtang ang matag Lunes iyang gigahin nga People’s Day sa iyanmg buhatan mismo sa kapitolyo.

Sa samang okasyton nagtigum ang mga bise mayor ug ilang gikaigo-an nga ipahigayon ang VMLP Inter-Town Basketball Tournament sugod sa Oktubre agig pagpahimsog di lang sa pisikal apan sa relasyon mismo sa mga sakop sa liga.