Gikalipay sa gobernador ang daling aksyon nga gihimo sa pagtuon sa kamahal sa isda sa Bohol

GIKALIPAY ni Gob. Edgar Chatto ang daling aksyon sa technical working group (TWG) nga iyang gipatuon sa mahal nga presyo sa isda ug ubang produkto sa dagat sa Bohol.

Nitaho si Chatto sa iyang senemanang programa sa radyo nga Kita ug ang Gobernador kagahapon (Biyernes) nga aduna na siyay inisyal nga kasayuran sa pagtuong gihimo sa TWG nga gipangunahan ni Provincial Agriculturist Liza Quirog, kinsa mao karoy hepe sa SEEMS Cluster sa kapitolyo, ug OIC Provincial Agriculturist Larry Pamugas.

Hinuon dawaton pa sa gobernador ang opisyal ug kinatibuk-ang resulta sa pagtuon sa TWG. Kini maglakip sa mga rekomendasyon.

Kini mahinungdanon sa pagtagad sa kahigwaos sa daghang Bol-anon nga maglisud na sa pagpalit og isda gumikan sa kataas sa presyo bisan pa og gihingusgan dinhi ang mga programa sa abundang abot sa kadagatan.

Kini nitumaw sab samtang ang gobernador sa Bohol mao mismoy nag-unang mamumulong sa pagtak-op sa dakung konperensiya didto sa Sugbo niadtong Huwebes kalabot sa proyektong FISH o Fisheries Improved for Sustainable Harvest.