Daghang kabataang kabus makapahimus sa mas lapad nga educational program sa probinsiya

MAS daghang kabataang kabus ang makapahimus sa mas lapad nga Educational Subsidy Program sa administrasyon ni Gob. Edgar Chatto ug Bise Gob. Inday Lim.

Ang bag-ong programa mopalapad sa CPG Scholarship Program sa probinsiya kay maapil na niini ang sistema sa ayudang pang-edukasyon nga gipatuman ug nagmalamposon sa kongresista pa si Chatto sa Unang Distrito.

Si Chatto mao mismoy amahan sa ordinansa nga nagtukod sa CPG Scholarship Program sa kapitolyo sa dihang siyay bise gobernador ug presiding officer sa hunta probinsiyal 14 ka tuig na ang nilabay.

Suportado sa SP karon ubos ni Bise Gob. Lim ang Educational Subsidy Program nunot sab sa positibong rekomendasyon sa komiteba sa edukasyon kansang tsirman mao si Bokal Yul Lopez ug komiteba sa aproprasyon pinangulohan mismo sa bise gobernador.

Ang de kalidad nga edukasyon nga maabot sa mas daghang kabataang Bol-anon usa sa mga nag-unang prayoridad ni Chatto kay alang kaniya ang tukmang kaalam bahandi sa mga kabus.