Managbuwag nga gituki sa gobernador sukad kagahapon ang inprastruktura, pagkaon ug kalikopan

MANAGBUWAG nga gituki sukad kagahapon ( Miyerkoles, Sept. 15)) ni Gob. Edgar Chatto ang kaugmaran sa inprastruktura, seguridad sa pagkaon ug kahimsog sa kalikopan

Namulong si Chatto sa provincial implementation planning ug graduation strategy workshop sa Bohol Bee Farm sa Dauis kalabot sa Philippine Provincial Roads Management Facility nga mahinungdanon sa pag-ugmad sa kadalanan.

Kini gisundan sa iyang pagpangulo sa tigum sa People’s Mansion sa gitawag og KALAHI Farmer’s Center – Bohol Convergence for Sustainable and Rural Development tumong sa abundang produksyon sa pagkaon.

Karong buntaga (Huwebes, Sept. 16) ang gobernador molagda sa memorandum of agreement sa paglusad sa Karood Watershed Model Forest Project atol sa seremonya nga himoon sa Bohol Tropics.

Mahinungdanong kabahin sa programa ni Chatto sa malungtarung kalambuan ang maayo nga kadalanan, busog nga katawhan ug himsog nga kalikopan.


Seryosong gisugdan ang pagtuki sa budget
sa probinsiya para sa sunod tuig 2011
---------------------------------------------------------------------------------------------------------------------
GISUGDAN na sa executive department sa kapitolyo ang pagdungog kon hearing sa annual budget sa mga buhatan sa kagamhanang probinsiyal alang sa tuig 2011.

Unang gihimo ang budget hearing kagahapon (Miyerkoles, Sept. 15) sa mga buhatan sa Provincial Accountant, Assessor, Treasurer, Planning and Development, ug Budget and Management.

Sugdan pagtuki karong hapon (Huwebes, Sept. 16) Ang budget sa mga devolved hospitals sa Clarin, Catigbian, Carmen, Inabanga, Pres. Garcia, Candijay ug Maribojoc nga pulos gidumala sa kagfamhanang probinsiyal.

Kini importante ilabina sa posibleng epekto ngadto sa mga tambalanan sa probinsiya sa gisugyot sa Department of Health nga paglaslas sa tinuig nga budget sa mga tambalanan nga gipondohan sa nasudnong kagamhanan sama sa Gov. Celestino Gallares Memorial Hospital.

Buot ni Gob. Edgar Chatto nga seryosohon ang pag-andam sa budget sa probinsiya para sa sunod tuig kay gani limitado ang pondo sa kapitolyo karon tungod sa dakung gasto sa eleksyon sa niaging administrasyon.