Unang pag-opisina ni Gob. Chatto sa iyang sub-office sa Talibon ning tuiga himoon karong adlawa

ADTO sa iyang sub-office sa Talibon mag-opisina si Gob. Edgar Chatto ning adlawa.

Ang gobernador gipaabot nga dugokon na sab sa mga konstituwente didto ug sa mga lider ug katawhan sa ubang dapit sa Segundo Distrito.

Ang pag-opisina ni Chatto sa iyang Governor’s Sub-office sa Talibon usa sa mga paagi sa pagdala sa panggoberno sa probinisiya ngadto mismo sa katawhan.

Kini maoy labing una niyang pag-opisina sa Talibon ning tuiga ug ikaduha sukad siya nagobernador human una kini niyang gibuhat sa Disyembre sa niaging tuig.

Si Chatto lang ang bugtong gobernador sa Bohol nga adunay tulo ka buhatan---ang Governor’s Office mismo sa kapitolyo diin siya atua matag Lunes nga iyang gideklarar nga People’s Day sa matag semana, ang silong sa People”s Mansion diin siya mag-opisina gikan sa Martes ngadto sa Biyernes, ug ang Governor’s Sub-Office sa Talibon sa matag ikaduhang Martes sa buwan.