GISUNOG sa HEAT Bohol ang ABC Balilihan sa pontos nga 81-63 sa basketball exhibition game sa kapistahan sa Hanopol.
Ang bag-o lang nga natukod nga HEAT Bohol basketball team gilangkuban sa mga kawani sa kapitolyo nga nakalusot human sa singot nga tryout.
Kini kabahin sa programa ni Gob. Edgar Chatto sa pagpaduol sa kagamhanang probinsiyal ngadto sa katawhan pinaagi sa paugnat sa kusog.
Giorganisar ang basketball team sa kapitolyo human sab namatikdan nga way kalihukan kalabot sa paugnat sa kusog sa matag pagpahigayon sa HEAT Caravan sa kalungsoran.
Ang HEAT Bohol team nakig-engkwentro na sab sa LGU Pitogo isip kabahin sa atraksyon sa kapistahan sa islang lungsod.
Natukod ang HEAT Bohol basketball team nunot sa inisyatiba ni capitol executive assistant Anggong Damalerio samtang ang coach niini mao ang laing executive assistant nga si Dodong Gacayan.
Naniid pa si Damalerio kon kinsa sa mga batan-on ug seksing kawani sa kapitolyo ang mahimong muse.
No comments:
Post a Comment