Gob. Chatto mideklarar sa iyang hignpit nga pagsalig ug pagtoo sa sistema sa pangpublikong edukasyon sa Bohol

GIDEKLARAR ni Gob. Edgar Chatto ang hingpit niyang pagsalig ug pagtoo sa sistema sa pangpublikong edukasyon sa Bohol.

Apan gitumbok sab sa gobernador ang gikinahanglan nga paghugot sa panag-usa ug pagtambayayong sa DepEd ug kagamhanang probinsiyal tumong sa de kalidad nga edukasyon.

Kini gipalanog ni Chatto samtang iyang gipapanumpa ang opisyales sa Bohol Public School Teachers and Employees Multi-Purpose Cooperative (BPSTEMPC) atol sa paglusad sa ika-50 nga sumad niini karong tuiga.

Ang kalihukan gisaksihan sa kadagkuan sa kooperatiba pinangunahan sa tsirman sa hunta direktiba niini nga si DepEd-Bohol superintendent Dr. Lorna Rances.

Gipahalipayan ni Chato ang kooperatiba sa mga magtutudlo nga adunay lay 38 ka membro ug kapital nga P38,000 sa pagsugod niini sa 1961.

Ang kooperatiba aduna na karoy 5,234 ka mga sakop ug kinatibuk-ang asset nga P124 milyones.