HAPSAY ang dagan sa panggoberno sa lalawigan tali sa sangang ehekutiba ubos sa buhatan sa gobernador ug lehislatura o Sangguniang Panlalawigan ubos sa bise gobernador sa unang unom ka buwan sa bag-ong administrasyon.
Kini timailhan sa nagkahiusang panglantaw tumong sa mas mapuslanong pangalagad ngadto sa mga Bol-anon sumala ni Gob. Edgar Chatto ug Bise Gob. Concepcion Lim.
Gitaho ni Lim atol sa labing unang Monday convocation sa kapitolyo ning tuiga nga napalusot sa hunta probinsiyal ang 27 ka ordinansa ug 323 ka resolusyon sukad sa paglingkud nila ni Chatto niadtong Hulyo.
Lakip niini ang ordinansa sa Educational Subsidy Program nga giduso sa gobernador ug gidasunan sa mga magbabalaod sa kapitolyo.
Matud ni SP Secretary Bonifacio Quirog napalusot sab ang katukoran o kaha kaugmaran sa Provincial Youth Development Council, Provincial Auction Sale Committee, Provincial Internal Audit Office, ang long-term training sa HRMDO, pag-rubberize sa oval sa CPG Sports Complex, ug pagdili sa mga improvised nga mga armas nga mobuto.
No comments:
Post a Comment