Tulo ka sunod-sunod nga summit ang himoon sa labing unang higayon sa kasaysayan sa probinisya

TULO ka dagkung summit sa Bohol ang himoon sa sud sa tulo ka buwan sugod ning Enero.

Kini labing una sa kasaysayan sa kagamhanan sa probinsiya nga tulo gyud ka sunod-sunod nga summit ang ipahigayon sa una lang nga kwarter sa tuig.

Gipahibawo ni Gob. Edgar Chatto sa convocation program sa kapitolyo ning adlawa nga ang una mao ang Provincial Organic Agriculture Summit nga madungan sa 2011 Ubi Festival karong petsa 19-20.

Mosunod ang Information and Communications Technology (ICT) Summit sa Pebrero human siya nakigtagbo dinhi kagahapon (Domingo) sa kadagkuan sa Commission on Information and Communications Technology (CICT) nga ubos sa huhatan sa presidente sa nasud.

Ang maong tigum nga gitambongan sab sa mga opisyal sa dagkung telecommunications companies (Telcos), business process outsourcing (BPO) ug Provincial ICT Council nagsaad og liboan ka bag-ong trabaho sa mga Bol-anon.

Ang ikatulo mao ang Provincial Tourism Summit sa Marso nga mopasuwabe sa pigura sa industriyang giila na nga usa sa mga pwersa sa lokal ug nasudnong ekonomiya.