Gihagit sa gobernador ang mga hepe sa nasudnong ahensiya dinhi sa paglig-on sa ilang kapunongan

GIHAGIT NI Gob. Edgar Chatto ang mga hepe sa nasudnong ahensiya dinhi sa paglig-on sa ilang kapunongan.

Giangkon sa pipila ka sakop sa Association of Bohol Executives of National Agencies (ABENA) nga angay gyud tinuod nga mahibalik ang kaaktibo sa ilang grupo.

Kataposang presidente sa ABENA si kanhi Bohol BIR chief Rogelio Balaga kinsa nadestino na karon sa syudad sa Talisay sa Sugbo.

Giawhag sab sa gobernador ang mga sakop sa ABENA sa pagsumitir sa ilang mga annual report sa 2010 ngadto sa iyang buhatan aron magkakomplemento ang mga programa ug aksyon sa ilang mga ahensiya ug kagamhanang probinsiyal.

Ang kapitolyo moapud-apud mismo og handbook ngadto sa mga nasudnong ahensiya sa Bohol kalabot sa mga programa sa probinsiya ning tuiga.