Adunay plano nga imbitahon mismo si Pres. Noynoy Aquino sa TBTK sa Mayo sa sunod tuig

ADUNAY plano nga imbitahon mismo si Pres. Noynoy Aquino sa Tigum Bol-anon sa Tibuok Kalibutan (TBTK) dinhi sa Mayo sa sunod tuig.

Kini di susama sa nangaging TBTK kanus-a ang mga Bol-anong balikbayan mohimo lang og courtesy call uban sa kadagkuan sa Bohol ngadto sa presidente sa Malacañang.

Matud ni TBTK president Betty Veloso-Garcia kinsa bayaw ni Gob. Edgar Chatto,
ang pag-anhi ni Pres. Aquino makalagsik mismo sa iyang kampanya sa Filipino homecoming isip pagpahimsog sa turismo.

Nibutyag si Veloso-Garcia nga gani kini ila karong gihingusgan ngadto sa kaigsoonang Bol-anon sa New York diin siya nagtrabaho.

Ang matag turista gibana-banang mogasto dinhi og 850 dolyares matag usa nga katumbas sa usa ka tuig nga suholan sa usa ka minimum wage earner sa Pilipinas.

Gituyo ang TBTK 2012 nga sa Mayo imbes Hulyo kay gawas nga tingbarato kini sa plete gikan sa gawas sa nasud, tingbakasyon sab kini sa mga estudyante ug tingpista sa Bohol diin mouli gyud ang mga Bol-anon.